Kelesi jyly elimizdegi barlyq HQKO-lar jańǵyrtylady
ASTANA. 26 qazan. QazAqparat /Marlan Jıembaı/ - Kelesi jyly elimizdegi barlyq halyqqa qyzmet kórsetý ortalyqtary jańǵyrtylady.
Bul týraly búgin QR Baılanys jáne aqparat mınıstrligi Memlekettik qyzmetterdi avtomattandyrýdy baqylaý jáne halyqqa qyzmet kórsetý ortalyqtarynyń qyzmetin úılestirý komıtetiniń tóraǵasy Baqyt Ábishev málim etti.
«Qazirgi ýaqytta halyqqa qyzmet kórsetý ortalyqtary jańǵyrtylý ústinde. Almaty men Astana qalalarynda tolyǵymen bitirdik. Oblys ortalyqtarynda bir-birden halyqqa qyzmet kórsetý ortalyqtary jańartylǵan túrde jumys isteýde. Endigi jyldyń aıaǵyna deıin barlyq aýdandardaǵy ortalyqtardy jańǵyrtatyn bolamyz», - dedi ol.
Onyń atap ótýinshe, ortalyqtardy jańǵyrtýdyń ereksheligi jańa tehnologııalardyń engizilýinde. Sonymen qatar halyqqa elektrondy sandyq qoltańba berý uıymdastyrylyp, qyzmetkerlerdiń barlyǵynyń bir deńgeıde jumys isteý ustanymy jolǵa qoıylǵan. «ıAǵnı terezelerdi alyp tastap, keńselik nusqa jasadyq. Árbir qyzmetkerdiń aldynda ekinshi monıtor tur. Sol arqyly ár qyzmetkerge tutynýshy óz baǵasyn bere alady. Onyń nátıjesin aıdyń aıaǵynda talqylap, jumysty jaqsy istegen qyzmetkerge syıaqy berý máselesin sheshetin bolamyz», - dedi komıtet tóraǵasy.
