Kelesi jyly Astanadan Qyzylordaǵa, Aqtóbege qaraı júretin jańa júrdek poıyzdar iske qosylady
ASTANA. 17 qazan. QazAqparat - 2014 jyly Astana - Qyzylorda, Almaty - Aqtóbe, Almaty - Zaşıta, Astana - Zaşıta jáne Almaty - Tashkent baǵyttarynda júrdek poıyzdardy iske qosý josparlanýda, dep habarlaıdy QR Kólik jáne kommýnıkatsııa mınıstrliginiń baspasóz qyzmetinen.
Atalǵan baǵyttardyń ashylýy osy óńirlerdegi jolaýshylar tasymalyna degen joǵary suranysty qanaǵattandyrýǵa múmkindik beredi, sondaı-aq ár baǵyt boıynsha jol júrý ýaqyty ortasha eseppen 1,5-2 esege deıin qysqarmaq. Aıtalyq, Astanadan Qyzylordaǵa jolaýshylar qazirgideı 2 táýlikte emes, bir táýliktiń ishinde jetetin bolady. Astana-Zaşıta júrdek poıyzy bolsa Pavlodar stansasyna aıaldaıtyn bolady.
Aǵymdaǵy jyly Almaty - Atyraý, Astana -Atyraý jáne Astana - Semeı baǵyttarynda jańa júrdek poıyzdarynyń iske qosylǵanyn aıtyp ótý kerek. Atalǵan baǵyttar boıynsha jol júrý ýaqyty eki esege deıin qysqartyldy. Barlyq poıyzdar 27 «Talgo» vagondarynan quralǵan. Olardyń 22-si jolaýshylar vagony, onyń ishinde 2 vagon «Grand» (ekioryndyq lıýks) sanatynda bolsa, 2 vagon «Bıznes» (ekioryndyq) sanatynda jáne 18 vagon «Týrıst» (tórtoryndyq ekonom) sanatynda. Poıyzda 3 tehnıkalyq vagon, 1 meıramhana jáne 1 bar-vagony bar. «Grand» sanatyndaǵy vagondardyń birinde múmkindigi shekteýli jandarǵa arnalǵan kýpe bar.
Sondaı-aq, 2013 jylǵy qańtarda Pavlodar - Astana baǵytyndaǵy jolaýshylar poıyzynyń baǵyty Qaraǵandyǵa deıin, al Astana - Oral baǵytyndaǵy jolaýshylar poıyzynyń baǵyty Aqtóbe qalasyna deıin uzartylǵan bolatyn.
Budan basqa, 2013 jyldyń 5 shildesinen bastap Astana - Býrabaı kýrorty baǵytynda jańa jolaýshylar júrdek poıyzy iske qosyldy. Jańa quram 6 vagonnan quralǵan, ár vagon 56 orynǵa eseptelgen. Jolda júrý ýaqyty 3 saǵat 55 mınýtty quraıdy.
2013 jyldyń 8 shildesinde Astana - Pavlodar baǵytyndaǵy jańa jolaýshylar poıyzy iske qosyldy. Poıyz aptasyna 4 ret: beısenbi, juma, senbi jáne jeksenbi kúnderi Astana qalasynan jolǵa shyǵady. Jolda júrý ýaqyty 6 saǵat 28 mınýt.
