Kelesi jyly Astanada 150 apatty úı súriledi
ASTANA. QazAqparat - 2018 jyldyń qańtar aıynda Astanada «Apatty úılerdi súrip tastaý» pılottyq jobasynyń ekinshi kezeńi bastalady, dep habarlaıdy ákimdiktiń medıa ortalyǵy .
Josparlanǵandaı, kelesi jyly elordada 150 kóppáterli eski úı buzylady, soǵan oraı 600 myń sharshy metrlik 8 500 páter paıdalanýǵa beriledi.
Apatty úılerdiń ıelerine burynǵy eski páterdiń ornyna súrilip tastalǵan úıdiń aýmaǵyna sáıkestendirilgen baspana beriletin bolady.
«Bul 1940-1980 jyldar aralyǵynda salynǵan negizgi qurylys qurylǵylary jáne ınjenerlik júıeler ábden tozǵan úıler. Ol úıler adam ómirine qaýip tóndiredi dep tanylyp, ári qaraı onda turýǵa ruqsat etilmedi. Sol sebepten de súrip tastaýǵa jatady. Pılottyq jobanyń sharttary boıynsha úılerdiń ıelerine súrilip tastalǵan úıdiń aýmaǵyna sáıkestendirilgen baspana beriletin bolady», - dedi qalalyq turǵyn-úı basqarmasynyń basshysy Ashat Eleýjanov.
Jyl sońyna deıin elordada «Apatty úılerdi súrip tastaý» pılottyq jobasynyń birinshi kezeńin iske asyrý boıynsha 228 úıdi súrip tastaý josparlanýda. Súrip tastaýǵa jatatyn úılerdiń kóbisi qalanyń oń jaǵalaýynda ornalasqan: «Saryarqa» aýdanynda - 124 úı, «Almaty» aýdanynda - 82 jáne «Esil» aýdanynda - 22 úı bar.
3500-den astam otbasy jańa páterlerge qonys aýdarady.
Onymen birge búginde 117 apaty úıdiń turǵyndary 1 570 otbasy kóshirildi.
Qalǵan apatty 111 úıdiń turǵyndary 2017 jyldyń ishinde kóshiriletin bolady: jyl sońyna deıin olarǵa 1 850 páter beriledi.
