Kelesi jyly Almaty kósheleri 100% jaryqpen qamtylady
ALMATY. QazAqparat – Almaty kóshelerin jaryqtandyrý deńgeıi 71% quraıdy, kelesi jylǵa qaraı bul kórsetkishti 100% deıin jetkizý josparlanyp otyr, dep habarlaıdy QazAqparat tilshisi.
«Ótken jyly Alataý, Naýryzbaı, Túrksib, Jetisý aýdandarynyń 329 kóshesine jaryq júıesin ornatý jumystary júrgizildi. Bıyl koronavırýs indeti men karantındik rejımge baılanysty bul jumys belgilengen merzimnen keshteý, ıaǵnı 1 shildeden bastaldy. Bul aýdandarda 157 kóshege jaryq júıesin ornatamyz»,– dep jazdy Almaty ákiminiń baspasóz hatshysy Áset Muqajanov Instagram –daǵy paraqshasynda.
Sonymen qatar, ol búgingi kúni kóshelerdegi jaryq júıesiniń deńgeıi 71% –dy quraıtynyn atap ótti.
«Jalpy kórsetkishti 100%-ǵa jetkizý úshin qalanyń barlyq aýdandarynyń 2024 kóshesine jaryq júıesin ornatý qajet. Bul jumysty kelesi jyly aıaqtaýdy josparlap otyrmyz»,–dep jazdy Áset Muqajanov.
