Kelesi jylǵa deıin kıikterdi atýǵa bolmaıdy - Ekologııa mınıstrligi

ASTANA. QazAqparat - Kıikterdi, olardyń bólikteri men derıvattaryn paıdalanýǵa moratorıı 2024 jylǵa deıin uzartyldy, dep habarlaıdy QazAqparat.

Ekologııa jáne tabıǵı resýrstar mınıstrliginiń málimetinshe, Qazaqstan aýmaǵynda kıikterdiń dúnıejúzilik popýlıatsııasynyń 90%-dan astamy mekendeıdi.

«Atalmysh janýarlardyń sanynyń azaıýyna baılanysty (2003 jyly 21 myń basty qurady) QR Úkimeti olardy qorǵaý boıynsha birqatar keshendi sharalar qabyldady, onyń ishinde kıikterdi paıdalanýǵa moratorıı engizildi.

Qabyldanǵan sharalardyń arqasynda búgingi kúni kıik sany 1,3 mln basqa (tóldeý kezeńine deıin) jetip otyr, aıta ketý kerek, olardyń ońtaıly sany 700-800 myńdy quraıdy», - delingen mınıstrlik habarlamasynda.

Bul rette, aýyl sharýashylyǵy janýarlary men kıikterdiń arasynda jaıylymdar men sýaratyn jerler úshin básekelestik kúsheıdi, kıikterdiń egin taptaý jaǵdaılary jıiledi. Osyǵan baılanysty, mınıstrlik 2023 jyly kıik popýlıatsııasyn basqarý jónindegi bıologııalyq negizdeme aıasynda olardy ǵylymı zertteýdi josparlady, onyń barysynda mynadaı máseleler zerdelenetin bolady:

1) kıik popýlıatsııalarynyń damý boljamy;

2) kıikterdiń arealy men kóshi-qon joldaryn naqtylaý;

3) kıikterdiń azyqtyq bazasyn zerdeleý;

4) aýyl sharýashylyǵymen básekelestikti tómendetý boıynsha usynystar ázirleý.

Osyǵan baılanysty, QR ETRM Orman sharýashylyǵy jáne janýarlar dúnıesi komıteti ǵylymı-zertteý jumystary kezeńinde 2022 jylǵy 28 jeltoqsandaǵy buıryqpen respýblıkanyń búkil aýmaǵynda kıikterdi, olardyń bólikteri men derıvattaryn paıdalanýǵa moratorııdi ǵylymı negizdemege sáıkes 2024 jylǵa deıin uzartty.