Kelesi jyldyń dári-dármekteri aldyn ala satyp alyndy - SK-Farmatsııa
ASTANA. QazAqparat - Kompanııa basshysy Nurjan Álibaevtyń aıtýynsha, kelesi jylǵa arnalǵan tegin medıtsınalyq qyzmet dári-dármekteriniń basym bóligi satyp alyndy, dep xabarlaıdy QazAqparat tilshisi.
«2017 jylǵa arnalǵan satyp alý ótken jylǵymen salystyrǵanda erterek júrgizildi. Qazirdiń ózinde kelesi jylǵy tutyný ónimderiniń 95 paıyzy boıynsha kelisimsharttar rásimdeldi. Búginde ónimniń 30 paıyzy biryńǵaı dıstrıbıýtordyń qoımalaryna jetkizildi. Qazirgi málimetke sáıkes, kelesi jyldyń dári-dármekterin aldyn ala satyp alýdyń arqasynda 11,7 mlrd. teńge únemdeldi. Jalpy, satyp alynǵan dári-dármekterdiń 52 paıyzy - otandyq ónimder", - dedi "SK-Farmatsııa" JShS basqarma tóraǵasy N.Álibaev búgin Ortalyq kommýnıkatsııalar qyzmetinde ótken baspasóz máslıxatynda.
Onyń aıtýynsha, sońǵy jeti jyldyń ishinde "SK-Farmatsııa" kompanııasy shamamen 55 mlrd. teńge bıýdjet qarajatyn únemdeı aldy. Aǵymdaǵy jylda únemdelgen qarajattyń kólemi 5,4 mlrd. teńgeni qurady. Degenmen, satyp alynǵandardyń teń jartysy otandyq kásiporyndarǵa tıesili bolsa da, bıýdjet aqshasynyń basym bóligi sheteldik dári-dármekterge jumsalyp otyr. Sebebi qymbat dárilerdi, kóbinese, transulttyq kompanııalar shyǵarady.
Aıta keteıik, 2009 jyly Úkimettiń sheshimimen "SK-Farmatsııa" JShS qurylǵan bolatyn. Kompanııanyń negizgi maqsaty - tegin medıtsınalyq kómekke kiretin dári-dármekterdi satyp alyp, densaýlyq saqtaý mekemelerine jetkizý. Biryńǵaı operatordy qurýdyń arqasynda bıýdjet qarajatyn únemdep otyrýǵa múmkindik týyp otyr.
