Kelesi jyldan bastap sottalǵandarǵa jappaı elektrondyq bilezik kıgizetin bolady
ASTANA. QazAqparat - 2015 jyldan bastap sottalǵandardy baqylaý úshin elektrondyq bilezikter jappaı paıdalanyla bastaıdy. Buǵan Úkimetten tıisti qarajat bólinýde.
Búgin Májiliste Qylmystyq-atqarý júıesindegi máselelerge arnalǵan Úkimet saǵatynda QR Іshki ister mınıstri Qalmuhanbet Qasymov málim etti.
«Shetelde «bilezikter» tájirıbesi áldeqashan qoldanylýda. Bizde bul alǵashqy ret jasalaıyn dep otyr. Osynyń ózi elimizdegi júıeni izgilendirý jáne Qazaqstannyń Qylmystyq-atqarý júıesin halyqaralyq standarttarǵa sáıkes keltirýde jasalyp otyrǵan kezekti qadam», - dedi Q. Qasymov.
Budan bólek, mınıstr 2015 jyldan bastap jańa qylmystyq zańnamanyń kúshine enetinin jetkizdi. Al jańa qylmystyq zańnamamen bas bostandyǵynan aıyrýmen baılanysty emes jazalardy qoldaný salasy eleýli túrde keńeıe túsedi.
«Bul jerde basty maqsat - jazalaý júıesin izgilendirý, ıaǵnı bostandyqta júrip te túzetetin adamdardy túrmelerge jaba bermeý. Jalpy, zańnamanyń bul jańalyǵy Qylmystyq-atqarý júıesindegi probatsııalyq qyzmetti odan ári damytý men jetildirdi talap etedi», - dedi Q. Qasymov.
Onyń sózine qaraǵanda, 2015 jyldan bastap probatsııalyq baqylaý belgilengen adamdardyń qatary shartty túrde merziminen buryn bosatylǵandar, bas bostandyǵyn shekteýge sottalǵandar jáne ákimshilik baqylaý belgilengen adamdar sanatymen tolyqtyrylady. Osyǵan baılanysty, probatsııa qyzmetiniń esebinde turǵan adamdar sanynyń 2,5 esege, ıaǵnı 55 myńǵa deıin kóbeıetini boljanyp otyr.
