Kelesi jyldan bastap qoǵamǵa paıdasyn tıgizgen ÚEU syıaqy alady

ASTANA. QazAqparat - 2016 jyldan bastap Qazaqstanda qoǵamǵa shyn paıdasyn tıgizgen úkimettik emes uıymdar syıaqy alady. Bul týraly búgin Ortalyq kommýnıkatsııalar qyzmetinde Mádenıet jáne sport vıtse-mınıstri Marat Ázimhanov málim etti.

«Úkimettik emes uıymdardyń qyzmeti týraly» jańa zań arqyly úkimettik emes uıymdar úshin syıaqylar berý máselesi qarastyrylyp otyr. 2016 jyldan bastap jyl saıyn eń úzdik, qoǵamǵa paıdaly qyzmet atqarǵan úkimettik emes uıymdarǵa osyndaı syıaqylar qarastyrylatyn bolady», - dep habarlady M.Ázimhanov.

Vıtse-mınıstrdiń aıtýynsha, jańa zań taǵy bir jańalyq engizip otyr. Endi Qazaqstanda úkimettik emes uıymdardyń derekqor bazasy qurylady.

«Jáne taǵy bir baǵyt - úkimettik emes uıymdardyń derekqor bazasyn qurý jónindegi jumystar. Ol baza ókiletti organnyń janynan qurylatyn bolady jáne barlyq úkimettik emes uıymdardyń atqarǵan jumystary, atqarylatyn jumystary jáne jobalary jóninde aqparat osy derekqorǵa engiziledi. Negizgi maqsat - qoǵam úshin, azamattar úshin, úkimettik emes uıymdardyń ashyqtyǵyn qamtamasyz etý. Bul da álemdik tájirıbe», - dedi ol.

Qazir osy zańǵa táýeldi granttardy bólý, syıaqylar bólý, operatordyń jumysy týraly zańnamalyq aktiler daıyndalýda. «Álbette bul qujattar úkimettik emes uıymdarmen birge talqylanyp, daıyndalyp jatyr»,-dedi vıtse-mınıstr.