Kelesi jyldan bastap qazaqstandyqtar jekemenshik aýrýhanalarda tegin emdele alady - E.Birtanov
«Jyldyń basynda Elbasy N.Nazarbaev densaýlyq saqtaý salasyn damytý jónindegi memlekettik baǵdarlamany bekitti. Densaýlyq saqtaýdy damytý baǵdarlamasynda alǵash ret memlekettik-jekemenshik qarym-qatynas máseleleri kórinis tapty. Osy baǵdarlama boıynsha densaýlyq saqtaý mınıstrligi jerilikti ákimdiktermen jumys istep jatyr. Naqtyraq aıtsam, ár oblysta «qaı mekeme jekemenshik sektordyń meńgerýine ótse, tıimdi bolady» degen máseleni talqylap jatyrmyz. Ekinshiden, osy memlekettik-jekemenshik áriptestik aıasynda jańadan nysandar salynýy kerek. Qaı nysandar jekemenshik ınvestıtsııaǵa salynatynyn anyqtaımyz»,-dedi vıtse-mınıstr.
Vıtse-mınıstr túsindirip ótkendeı, memlekettik-jekemenshik sektor aıasynda jańadan salynatyn densaýlyq saqtaý nysandarynyń ınvestıtsııasy 5-7 jyldan bastap 20 jyl ishinde túgel qaıtarylady. Al, qazir jumys istep turǵan densaýlyq saqtaý nysandaryn memlekettik-jekemenshik áriptestikke qalaı tartamyz degen máselege toqtalǵan ol: «ekinshi bir jańalyq - qazir jumys istep turǵan ártúrli densaýlyq saqtaý mekemelerin memleket tarapynan jekemenshik sektorǵa tapsyrý máselesi. Bul jaǵdaıda biz ınvestıtsııalyq tarıf engizbeıbiz. Kelesi jyldan bastap memlekettik medıtsınalyq saqtandyrý qory jumysyn bastaıdy. Sol kezde halyq jekemenshik medıtsınalyq uıymdarda tegin emdele alady. Tek ol medıtsınalyq uıym osy saqtandyrý qorymen kelisimshart jasasýy kerek. Qazir jekemenshik emdeý ornyna barý úshin halyq óz qaltasynan aqsha shyǵarady. Al, qor jumysyn bastaǵan soń, ıaǵnı, kelesi jyldan naýqas qaltasynan aqsha tólemeıdi. Jekemenshik emhana naýqastyń em alǵan baǵasyn saqtandyrý qoryna jiberedi, osylaısha, onyń ketken shyǵynyn qor tóleıdi. Tek baryp em alǵan mekeme qormen kelisimshart jasaýy kerek», - dep túsindirdi.
Vıtse-mınıstr atap ótkendeı, SPID ortalyqtary, týberkýlez dıspanserleri men psıhıkalyq aýytqýy bar naýqastardy emdeıtin oryndar jekemenshikke ótpeıdi.