Kelesi jyldan bastap Astanada tolyq abattandyrylmaǵan kóshe paıdalanýǵa qabyldanbaıdy
ASTANA. QazAqparat - Elorda ákiminiń eskertýinen keıin kelesi jyldan bastap qalanyń bir de bir kóshesi tolyq abattandyrylmaıynsha paıdalanýǵa qabyldanbaıtyn bolady, dep habarlaıdy elorda ákimdiginiń medıa ortalyǵy.
Astana ákimi Áset Isekeshevtiń tóraǵalyǵymen ákimdikte ótken aptalyq apparat jınalysynyń kezekti otyrysynda qala tirshiligine qatysty birqatar máseleler qaraldy.
Aptalyq jıynda birinshi bolyp qala ákiminiń orynbasary Sergeı Horoshýn turǵyn úıdiń úleskerlik qurylysy týraly baıandama jasady.
«Qazirgi kúni úleskerlerdiń tańdaýynyń nátıjesinde «Abat» problemaly nysanynyń qurylysshysy anyqtaldy. MSQB men Astana qalasynyń ІІD anyqtaǵan buzýshylyqtar negizinde páterlerdi ótkizý faktisi boıynsha 43 qylmystyq is qozǵaldy. Qurylys kompanııalaryna qatysty sotqa deıingi tergeý jumystary júrgizilip jatyr. «Magıstralnyı 3» TK burynǵy basshysynyń qamaýǵa alynýyna baılanysty EKSPO aýmaǵyndaǵy «Roıal EKSPO» TK baqylaýǵa alyndy. Búgin úleskerlik qurylys máselesi jónindegi vedomstvoaralyq komıssııanyń otyrysy ótedi», - dedi Sergeı Horoshýn óz sózinde.
Ekinshi bolyp Tótenshe jaǵdaılar departamentiniń dırektory Barat Dúzaqbaev baıandama jasady. Onyń aıtýynsha, departament mamandary ótken aptada 85 shaqyrtýǵa qyzmet kórsetip, 9 adamnyń ómirin qutqaryp qalǵan.
Jıynda qaralǵan úshinshi másele - qala turǵyndaryn tumaýǵa qarsy egý naýqany men qoǵamdyq densaýlyq saqtaýdyń basqa da sharalary.
Aıta ketý kerek, elorda ákiminiń eskertýinen keıin kelesi jyldan bastap qalanyń bir de bir kóshesi tolyq abattandyrylmastan paıdalanýǵa qabyldanbaıtyn bolady.
Buǵan qosa, apparat otyrysynda Saryarqa, Almaty jáne Esil aýdanynyń ákimderi óz aýmaqtaryndaǵy abattandyrý jáne sanıtarlyq jaǵdaıy týraly baıandama jasady.
Astana ákimi erekshe toqtalyp ótken máselelerdiń biri - qalany kógaldandyrý tujyrymdamasy. Áset Isekeshevtiń aıtýynsha shahardy kógaldandyrýǵa jyl saıyn qala qazynasynan 7 mlrd teńge bólinedi.
«Men kógaldandyrýǵa bólinetin bıýdjet qarjysyn únemdep, uqypty jumsaý qajettigin birneshe ret aıttym. Osy ýaqytqa deıin qala ákiminiń orynbasary men Tabıǵı resýrstar basqarmasynan tıisti usynystar áli túsken joq. Jyl saıyn biz atalǵan salaǵa kóp mólsherde - shamamen 7 mlrd teńge kóleminde qarjy jumsaımyz. Qarjynyń qomaqty kólemde bólinetindigine qaramastan kógaldandyrýdyń jalpyqalalyq saıasatyn qalyptastyratyn jaýapty organ joq», - degen Áset Isekeshev, kógaldandyrýmen aınalysatyn mekemelerdiń jumysyn synǵa aldy.
Onyń paıymynsha abattandyrý máselesine kelgende, zamanaýı tásilderdi belsendi qoldanysqa engizý qajet. Eń bastysy jasyl kóshetter jyl on eki aı boıy jáne tek sol jaǵalaýdy ǵana emes, qalanyń barlyq aýmaǵyn bezendirýi tıis.
