Kelesi jekpe-jegim qashan óteri áli belgisiz - Soılybaev
ASTANA. QazAqparat - Qazaqstandyq kásipqoı boksshy Bekman Soılybaev meksıkalyq Fernando Vargaspen aradaǵy jekpe-jektiń qalaı ótkenin aıtyp berdi, dep habarlaıdy QazAqparat.
«Jekpe-jek óte tartysty ótti. Ónerim bapkerlerdiń de kóńilinen shyqty. Al endi qarsylasym Fernado Vargasqa keler bolsam, ol óte tájirıbeli boksshy. Ekeýimiz 10 raýnd boıy judyryqtastyq. Jaqsy jekpe-jek boldy dep oılaımyn. Habar arnasynyń kórsetkenine jáne maǵan jankúıer bolǵan barlyǵyna rızashylyǵymdy bildiremin», - dedi Soılybaev.
Onyń aıtýynsha, bul jekpe-jeke daıyndyq eki jarym aı buryn bastalyp, qarsylastyń sharshy alańdaǵy urys máneri zerdelengen.
«Buǵan deıingi qarsylastaryma qaraǵanda tájirıbeli. Kóbinese alǵa umytylyp, artyq qozǵalystardy kóp jasaıtyn boksshy eken. Bir-eki soqqy jasap, odan keıin barlaýǵa kóshedi. Mende onyń aldyn orap, birinshi soqqy jasap otyrýǵa tyrystym», - dedi ol.
Boksshy jekpe-jek aıaqtalǵannan keıin jaraqat alǵan qolyn teksertý úshin aýrýhanaǵa baryp, rengenge túsirgenin aıtty.
«Kelesi jekpe-jektiń qashan ótetindigi áli belgisiz. Reıtıng ósken saıyn qarsylastar da myqty bolady jáne ony tabý da qıyn. Bireý kelisse de, artynan aınyp qalyp jatady. Sondyqtan kelesi jekpe-jegim belgisiz bolyp tur», - dedi boksshy.
Aıta keteıik, 19 qazan kúni AQSh-tyń Las-Vegas qalasynda «Golden boı» promoýterlik ortalyǵymen ótken kásipqoı boks keshinde Bekman Soılybaev meksıkalyq Fernando Vargaspen judyryqtasyp, tóreshilerdiń biraýyzdy sheshimimen jeńiske jetti. Osylaısha, otandasymyz osy jyldyń sáýir aıynda jeńip alǵan ekinshi jeńil salmaq dárejesindegi WBC International chempıondyq belbeýin qorǵap qaldy. Soılybaev pen Vargas arasyndaǵy jekpe-jek Las-Vegastyń áıgili Monte Carlo Resort and Casino qonaqúıinde ótip, ony álemdegi alpaýyt agenttikterdiń biri ESPN telearnasy tikeleı efırden kórsetti. Jalpy, búginde 27 jastaǵy Bekman Soılybaev kásipqoı sharshy alańda 12 aıqas ótkizip, barlyǵynda jeńiske jetken. Tórt qarsylasyn nokaýtpen jeńdi. Enshisinde WBC International jáne WBA NABA chempıondyq belbeýleri bar.
