Kelesi Ramazanǵa deıin aman-esen jetip, mol saýapqa kenelýdi násip etkeı - Bas múftı

NUR-SULTAN. QazAqparat - Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly halyqty Oraza aıt merekesimen quttyqtady, dep habarlaıdy QazAqparat QMDB baspasóz qyzmetine silteme jasap.

«Qurmetti otandastar!

Sizderdi kúlli musylman balasynyń ulyq merekesi – Oraza aıtpen shyn júrekten quttyqtaımyn! Aıt qabyl bolsyn, aǵaıyn!

«Aıt» sózi – «merekeleý», «hal surasý», «bir-birin qýantý», «qýanyshqa toptalý» degen maǵynalardy bildiredi. Oraza aıt meıramynda júrekke meıirim, qýanysh sezimi uıalaıdy. Osynaý sáýleli sátte barshańyzǵa rııasyz nıetpen Allanyń amandyǵy men berekesin tileımin. Jaratqan januıalaryńyzǵa jar bolsyn!

Oraza aıt – bir aı boıy oraza ustap, yqylaspen jaqsylyq jasaǵan adamnyń qurmetke, marapatqa ıe bolatyn sáti. Alla Taǵala: «Men paryz etken orazany pendelerim ótep, aqysyn alýǵa (aıt namazyn óteýge) meshitke bet aldy. Olar Men úshin oraza ustady, Meniń pármenimmen aýyz ashty, endi qýanyshqa kenelsin...» deıdi. Rabbymyz barshamyzdyń qýanyshymyzdy arttyryp, eki dúnıede de mereıimizdi ústem etkeı.

Alla Taǵala ustaǵan orazamyzdy, muqtaj jandarǵa úlestirgen zeketimiz ben pitir sadaqamyzdy, bergen aýyzasharymyzdy qabyl etip, mol saýap jazǵaı. Saýaptar eselenip jazylatyn berekeli aıda kóńili jabyrqaý jandardyń júregine qýanysh syılaýǵa tyrystyq. Osy rette Qazaqstan musylmandary dinı basqarmasynyń ıgi bastamasyna ún qosyp, meshitterimizde atqarylǵan izgi is-sharalarǵa, qaıyrymdylyq aktsııalaryna belsendi túrde úles qosqan barsha jomart jandarǵa Allanyń nury jaýsyn deımin. Іzgi amaldaryńyzdyń jaqsylyǵy men saýaby arta túsýine tilektespin.

Qadirli jamaǵat!

Oraza aıt merekesi qutty bolsyn! Ár shańyraqqa baq pen bereke, birlik pen tatýlyq tileımin. Alla Taǵala barshamyzdy kelesi Ramazanǵa deıin aman-esen jetkizip, mol saýapqa kenelýdi násip etkeı.

Halqymyz aman, jurtymyz tynysh, eńseli elimizdiń bolashaǵy jarqyn, Táýelsizdigimiz baıandy bolǵaı! Ámın!» - delingen quttyqtaý mátininde.