Kelesi Olımpıada oıyndarynda qandaı sport túrleri bolmaıdy
Osylaısha, tizimnen karate, beısbol jáne softbol alynyp tastaldy.
Olardyń ornyna Oıyndar qataryna breık-dans, sonymen qatar sporttyq quzǵa shyǵý, skeıtbordıng jáne serfıng qosylady.
Sońǵy úsh sport túrin Halyqaralyq olımpıada komıteti Tokıoda ótken Olımpıada oıyndarynyń baǵdarlamasyna qosqan bolatyn.
Uıymdastyrý komıteti bul sheshimniń naqty ekenin jáne endi ózgertilmeıtinin málimdedi. Tańdaý jasarda komıtet áleýmettik jelilerdegi sport túrleriniń jastar arasyndaǵy tanymaldylyǵyna saraptama jasady.
Degenmen Búkilálemdik karate federatsııasy bul sport túriniń ári qaraı Oıyndar tiziminde qalýǵa laıyqty ekenin málimdedi.
«Biz álemge karateniń biregeı sport túri ekenin dáleldep, Olımpıada baǵdarlamasyna turaqty sport túri retinde qosylýǵa laıyqty ekenimizdi kórsettik. Karate Olımpıadaǵa álem boıynsha sport jankúıerleri baǵalaıtyn qundylyqtardy ákeldi», - dedi WKF prezıdenti Antonıo Espınos.
Oıyndar tiziminen karateni alyp tastaý sheshimine Olımpıada chempıony Stıven da Kosta qarsylyq bildirdi. Ol 37 kılogramǵa deıingi salmaqta jeńimpaz atanǵan.
«Men kóp jattyqtym. Favorıt atandym. Frantsııaǵa altyn ákeldim. Men týdy joǵary kóterdim. Sol úshin de óte baqytty boldym. 2024 jyly sizderdiń qoldaýlaryńyzben Parıjde tıtýlymdy qorǵaǵym keledi», - dep jazdy sportshy Twitter-de.
Eske sala keteıik, karate alǵash ret Olımpıada baǵdarlamasyna Tokıodaǵy oıyndarda qosyldy. Bul otandyq karateshiler Darhan Asadilov pen Sofıa Berýltsevaǵa Qazaqstan úshin eki qola alyp kelýge múmkindik berdi.
