Kelesi maýsymnan bastap Premer-lıga klýbtary qazaqstandyq fýtboldyń túlegi emes 8 fýtbolshyny ǵana tirkeı alady - QFF
ASTANA. QazAqparat - Astanada Qazaqstan fýtbol federatsııasy atqarýshy komıtetiniń otyrysy ótti. Kásipqoı fýtbol lıgasy Keńesiniń usynysy boıynsha jıynda birqatar sheshimder qaraldy ári bekitildi. Bul týraly QFF baspasóz qyzmeti habarlady.
Otyrys barysynda 2016, 2017 jáne 2018 jylǵy maýsymda kásipqoı fýtbol klýbtary arasyndaǵy jarystardy ótkizý quqyǵy Qazaqstan Kásipqoı fýtbol lıgasyna berildi. Sondaı-aq, kelesi maýsymnan bastap Premer-lıga klýbtary qazaqstandyq fýtboldyń túlekteri sanalmaıtyn 8 fýtbolshyny ǵana tirkeı alady. Olardyń altaýynyń alańǵa shyǵýǵa quqyǵy bar. Sonymen qatar, Lıga Keńesiniń usynysy boıynsha Birinshi lıga klýbtaryna qazaqstandyq fýtboldyń túlegi sanalmaıtyn 3 fýtbolshyny qosý usynysy bekitildi. 2016 jylǵy maýsymda Premer-Lıga klýbtarynda jas oıynshylardyń (lımıtchık) oıynǵa qatysýy mindetti emes. Alaıda, match hattamasynda mindetti túrde eki jas fýtbolshy tirkelýi kerek. Birinshi lıgada 3 jas fýtbolshy (lımıtchık) qatysýy tıis.
Buǵan qosa «Qazaqstan Respýblıkasy fýtbol klýbtaryn sertıfıkatsııalaý erejesi men ÝEFA klýbtyq týrnırlerine qatysatyndar úshin qarjylyq «Feır - pleı» erejesi jáne «Deldaldarmen jumys boıynsha QFF erejesi» bekitildi.
Sonymen qatar, qazaqstandyq fýtboldy damytýdyń basqa da ózekti suraqtary talqylandy.
