Kelesi 180 kúnde suıytylǵan gaz baǵasy sál ósýi múmkin – Energetıka mınıstri

NUR-SULTAN. QazAqparat – QR Energetıka mınıstri Bolat Aqsholaqov Májiliste ótken Úkimet saǵatynan keıin Baq ókilderine bergen jaýabynda jyl aıaǵyna deıin suıytylǵan gazdyń baǵasy qymbattaýy múmkin ekenin málim etti, dep habarlaıdy QazAqparat tilshisi.

«Ózderińiz bilesizder, tabıǵı gazdyń baǵasyn bizder birlesken buıryqpen bekitip qoıdyq. Ortasha deńgeıde 8 paıyz ósedi. Al suıytylǵan gazǵa kelsek, jyl aıaǵyna deıin zańdy túrde bekitýge múmkindik joq. Bizder ony baqylaýǵa alýdy maqsat etip otyrmyz. Úkimet bizdiń mınıstrlikke, Básekelestikti qorǵaý jáne damytý agenttigine, Ulttyq ekonomıka mınıstrligine osyndaı mindet júktep otyr», - dedi Bolat Aqsholaqov.

Mınıstrdiń paıymynsha, bul máselede gaz óndirip otyrǵan zaýyttardyń da jaǵdaıyn oılaý qajet.

«Qazirgi tańda suıytylǵan gazdyń ortasha baǵasy bir tonnasyna 28 myń teńge. Bul, árıne, ózindik qunyn aqtamaıdy. Bekitilgen baǵa 28 myń teńge bolsa, ózindik quny 60-90 myń tegeniń arasynda qubylady, ár zaýytta árqalaı. Sondyqtan biz ony shamamen kóterýimiz kerek negizi. Kelesi 180 kúndikke suıytylǵan gazdyń baǵasy sál ósýi múmkin – 20 paıyzdan artyq emes. Kóp emes, mysaly, qazir bir tonnasy 28 myń teńge bolsa, 36 myń bolady. Basqasha aıtqanda, kóterme baǵa 1 lıtrge 27 teńgeden bolsa, 29 teńge bolady.

Janarmaı quıý stansalaryndaǵy baǵany búkil quzertti organdar baqylaýyna alady. Baǵany negizsiz kóterýge jol berilmeıdi. Ondaı faktiler boıynsha tıisti sharalar qoldanylady», - dedi Bolat Aqsholaqov.

Sondaı-aq, búgingi Úkimet saǵatynda kóleńkeli eksport suıytylǵan gaz baǵasyn qymbattatýy múmkin ekenin aıtty.