Keleshekte qarapaıym adamdar da steıblkoındy kúndelikti qoldanady – bank sarapshysy

ASTANA. KAZINFORM – Birneshe jyldan keıin qarapaıym adamdar da steıblkoındy kúndelikti qoldanady. Bul týraly Kazinform agenttiginiń BIZDIÑ ORTA podkastynda bank sektorynyń ókili Aıjan Berdalına aıtty.

Bank sektorynyń ókili Aıjan Berdalına bankter úshin teńgelik steıblkoın aqshany jyldam ári qaýipsiz aýdarý tásilin synap kórý, sol arqyly klıentter men bızneske ınnovatsııalyq ónimder usyný múmkindigi ekenin aıtady.

– Qazir Ulttyq bankpen birge bul tehnologııany tekseremiz. Burynyryq mobıldi aýdarym, onlinebank bolǵan joq. Qazir bári qoldanady. Adamdarǵa óte yńǵaıly. Sol sııaqty birneshe jyldan soń steıblkoındy qarapaıym adamdar da qoldanatyn bolady. Steıblkoın – óte jyldam aınalatyn tsıfrlyq aktıv. Mysaly, qazir bıznes halyqaralyq aýdarymdar jiberý úshin komıssııa tólep, aqsha alýshyǵa jetýi úshin 2-3 kún ketedi. Al steıblkoın qoldanǵan kezde óte jyldam bolady. Tipti sekýndqa jetpeıtin ýaqyt ishinde aqsha satýshyǵa nemese satyp alýshyǵa jetedi. Sondyqtan keleshekte óte paıdaly bolady dep oılaımyn, - dedi Aıjan Berdalına.

Al Ulttyq banktiń ınnovatsııalar boıynsha sarapshysy Baqyt Smekenov teńgelik steıblkoın krıptonaryqtaǵy ótimdiligi joǵary ártúrli tranzaktsııalarda keńinen qoldanylatyn krıptoqural sanalatynyn atap ótedi.

– Steıblkoındardyń qoldanylý maqsatyna nemese qamtamasyz etý aktıvine baılanysty túrleri bolady. Aqshamen qamtamasyz etilse fıattyq steıblkoın, al altynmen, bırjada saýda-sattyq jasalatyn taýarlarmen qamtamasyz etilse taýarlyq steıblkoın dep atalady. Al úshinshi túri – krıptolendirilgen steıblkoın. Buǵan deıin elimizdiń qarjy naryǵynda sheteldik steıblkoındar ǵana aınalymda boldy. Al bul naryqqa teńgelik steıblkoınniń qosylýy tarıhı oqıǵa sanalady. Bul - qarjy salasyndaǵy jańa qyzmetterdi, ónimderdi jasaýǵa múmkindik beretin qural, qarjy júıemizdiń damýyna tyń serpin beretin saty, - dedi ol.

Buǵan deıin elimizde teńgege baılanǵan alǵashqy steıblkoın iske qosylǵanyn jazǵan edik.