Keleshekte elordada qansha jol aıyryǵy salynady
ASTANA. QazAqparat –«Astana Bas jospary» ǴZJI» JShS qalalyq kólik tobynyń bas mamany Aqmaral Temirova keleshekte elordada qansha jol aıyryǵy salynatyndyǵyn aıtty, dep habarlaıdy QazAqparat tilshisi.
«Qazirgi ýaqytta magıstraldy kósheler men joldardyń qıylysynda 21 jol aıyryǵy bar. Uzaq merzimdi keleshekte, ıaǵnı 2035, 2050 jyldarǵa qaraı taǵy 64 jańa qurylys salý josparlanyp otyr. Taıaý ýaqytta shaǵyn aınalma joldarda birneshe jol aıyryǵyn salý kózdelgen. Olar – qazirgi ýaqytta qurylysy júrgizilip jatqan joldar», - dedi ol «Astana qalasynyń 2035 jylǵa deıingi bas josparynyń» jańa jobasy boıynsha qoǵamdyq talqylaý aıasynda QazAqparat tilshisine bergen suhbatynda.
Onyń naqtylaı túsýinshe, shaǵyn aınalma jol birneshe kósheden turady.
«Shaǵy aınalma jol Shabal Beısekovadan bastalyp, Uly dala kóshesine ulasady. Odan keıin qalanyń ońtústik-shyǵys bóligi arqyly Qoshqarbaev kóshesine ulasyp, óndiristik aımaq pen Ál-Farabı dańǵylyn qamtıdy. Taıaý ýaqytta temir jol ótkeli aýdanynda, Maqtumquly kóshesi men Bógenbaı dańǵylynda eki jol aıryǵyn salý josparlanyp otyr. 2035 jylǵa qaraı Kenesary kóshesi boıynda úsh kópir salynady», - dedi Aqmaral Temirova.
