Keleshekte Aýǵanstan Pákistan men Ortalyq Azııa elderi arasyndaǵy tranzıtti elge aınala alady
ASTANA. 25 sáýir. QazAqparat - Keleshekte Aýǵanstan Pákistan men Ortalyq Azııa elderi arasyndaǵy tranzıtti elge aınala alady. Búgin Astanada ótip jatqan Eýrazııa medıa forýmy barysynda sóz sóılegen Qyrǵyz Parlamentiniń depýtaty Qanybek Imanalıev osylaı málimdedi.
«Sońǵy 40 jylda biz Aýǵanstandy tek áskerı turǵyda, áskerı kúshter turǵysynda ǵana qarastyryp keldik. Alaıda, Aýǵanstan ekonomıka turǵysynan da qyzyqty. Búgingi tańda bul el barlyq gýmanıtarlyq uıymdardy tartyp otyr. Al keleshekte Aýǵanstan Pákistan men Ortalyq Azııa elderi arasyndaǵy tranzıtti elge aınala alady», - dedi Q. Imanalıev.
Onyń aıtýynsha, osyǵan uqsas jobaǵa búgingi tańda Qyrǵyzstan men Tájikstan atsalysyp, qatysyp jatyr. Onyń aıtýynsha bul Qyrǵyzstan men Tájikstannan Aýǵanstan men Pákistan arqyly elektr energııasyn jetkizý boıynsha qaıtarymsyz joba bolyp tabylady.
«Osy turǵydan alǵanda búgingi Aýǵanstan gýmanıtarlyq kómekti asa qajet etedi. Ol elde mıneraldy ken oryndary, sırek kezdesetin metalldardyń kenderi bar. Alaıda, búgingi tańda ol elde naqty túrde tek qytaılyq kompanııalar ǵana jumys isteýde», - dedi Q. Imanalıev.
