Keleshekte ár oblys, aýdan ortalyqtarynda Ońaltý ortalyǵy bolady - Saparbaev
Baıqaýda Qazaqstannyń ár óńirinen kelgen 9 adam jeńimpaz atandy.
«Árbir adamnyń maqsaty, armany - qasyndaǵylarǵa kómektesip, olardyń alǵysyn alyp, jaǵdaıyn jasaý. Áleýmettik qyzmetkerler eńbektegen baladan eńkeıgen qarııaǵa deıin kómektesip, olarǵa ýaqytyn, densaýlyǵyn aıamaıdy. Men Qazaqstan úkimeti atynan sizderge úlken rahmet aıtam», - deıdi QR Premer-mınıstriniń orynbasary Berdibek Saparbaev.
Ol memlekettiń saıasaty - ár ýaqytta halyqtyń jaǵdaıyn, turmysyn jaqsartyp, áleýmettik salaǵa kóńil ekendigin aıtty.
«Qazirgi tańda 5 mıllıonǵa jýyq qazaqstandyq áleýmettik sala arqyly qamqorlyq alady. Bıyl áleýmettik salaǵa bólingen qarajat 3,4 trıllıon teńge. Biz bul jumysty ári qaraı jalǵastyrýymyz kerek. Kelesi jyldan bastap áleýmettik portaldy iske qosatyn bolamyz. Sondaǵy eń negizgi másele - múmkindigi shekteýli azamattarǵa kerekti qural-saıman, jabdyqtardy memlekettik satyp alýsyz alyp berý», - deıdi ol.
Sondaı-aq, QR Premer-mınıstriniń orynbasary barlyq Qazaqstannyń áleýmettik kartasy daıyndalǵanyn aıtty.
«Soǵan qarap elimizdegi eń muqtaj adamdarǵa kómektesemiz. Odan keıin múmkindigi shekteýli azamattarǵa ońaltý ortalyǵyn salý kerek. Keleshekte árbir oblys, aýdan ortalyqtarynda sondaı ońaltý ortalyqtary bolsyn degen maqsatymyz bar. Elimizde 224 áleýmettik joba bar, bul jobany jeti jyl buryn bastaǵanda 50 ǵana joba bolǵan. Eńbek etkisi kelgen adamǵa elimizde qoldaý jáne ártúrli memlekettik baǵdarlamalar bar», - deıdi ol.
2011 jyly QR Prezıdentiniń jarlyǵymen qazan aıynyń sońǵy jeksenbisi «Áleýmettik júıe qyzmetkerleriniń kúni» bolyp bekitilgen.
Eske sala ketsek, buǵan deıin elordada úzdik áleýmettik joba avtorlary marapattalǵanyn jazǵan bolatynbyz.
