«Keleshek» júıesinde 92 myńnan astam salym ashyldy
ASTANA. KAZINFORM — «Keleshek» bilim berý júıesi aıasynda 92 myńnan astam salym ashylǵan. Bul týraly Ǵylym jáne joǵary bilim vıtse-mınıstri Gúlzat Kóbenova aıtyp berdi.
Memleket 5 jastan bastap balalar úshin bastapqy bilim berý kapıtalyn jasaıdy, ony jyl saıyn memlekettik syılyqaqymen jáne ınvestıtsııalyq tabyspen tolyqtyryp otyrady.
— «Keleshek» erikti jınaqtaý bilim berý júıesi 2025 jyly iske qosyldy jáne qazirdiń ózinde 92 myńnan astam salym ashyldy. Bul qoǵamnyń atalǵan modelge degen senimin jáne onyń áleýmettik suranysqa ıe ekenin kórsetedi. «Keleshek» – Prezıdent tapsyrmasy boıynsha ázirlengen bilimge qoljetimdiliktiń jańa arhıtektýrasy, — dedi G. Kóbenova Ortalyq kommýnıkatsııalar qyzmetinde ótken brıfıngte.
Bul júıe bilim alýǵa qarajat jınaý mádenıetin qalyptastyrady, bolashaqta bıýdjet pen otbasyǵa túsetin salmaqty azaıtady jáne Qazaqstandy damyǵan elderde burynnan qoldanylyp kele jatqan modelderge jaqyndatady.
Búgingi tańda 92 275 «Keleshek» shoty ashyldy (1 jastan 5 jasqa deıin), onyń ishinde 8 042 bes jasar balaǵa 1 902 930 720 teńge somasynda bastapqy bilim berý kapıtaly tólendi.
— Mańyzdy jaıt: «Keleshek» granttardy almastyrmaıdy, ol otbasylardyń múmkindikterin keńeıtedi, — dep tolyqtyrdy vıtse-mınıstr.
Aıta keteıik, «Keleshek» salymdary ekinshi deńgeıli bankterde jáne ómirdi saqtandyrý kompanııalarynda ashylady. Onda memleketten jyl saıynǵy syılyqaqylar, ınvestıtsııalyq tabys, salymdarǵa kepildik berý, sondaı-aq óndirip alýdan (arest, úshinshi tulǵalardyń talaptary) qorǵaý qarastyrylǵan.
Bastapqy bilim berý kapıtaly 5 jasar balalarǵa bıýdjetten bir rettik 60 AEK (259 500 teńge) mólsherinde, al jetim balalar men ata-ana qamqorlyǵynsyz qalǵan balalarǵa 120 AEK (519 000 teńge) mólsherinde aýdarylady. Osylaısha 13 jyl ishinde otbasylyq bıýdjetke aıtarlyqtaı salmaq salmaı, bilim alýǵa qajetti qarajatty jınaqtaý múmkindigi bar.
Sonymen qatar, eger bala bilim berý uıymyna grantqa tússe, ol bolashaqta:
jınaqtaýdy jalǵastyra alady;
óz jınaqtaryn úshinshi tulǵanyń paıdasyna aýdara alady;
bilim alýdyń basqa deńgeılerine baǵyttaı alady;
turǵyn úıge jumsaı alady.
Al dıplom alǵan jaǵdaıda, barlyq tólemderimen qosa qarajatty sheship alý múmkindigi qosymsha paıda bolady.
Eske salsaq, byltyr qańtar aıynda Memleket basshysy «Keleshek» jınaqtaý júıesi týraly zańǵa qol qoıǵan edi.