«Keleshek» júıesi: balalarǵa arnalǵan 60 myń shot ashyldy

ASTANA. KAZINFORM — «Keleshek» biryńǵaı erikti jınaqtaý júıesi aıasynda qansha salymshy tirkeldi? Bul suraqqa Ǵylym jáne joǵary bilim mınıstrliginiń Joǵary jáne joǵary oqý ornynan keıingi bilim komıteti jaýap berdi.

— 2025 jylǵy 1 jeltoqsandaǵy jaǵdaı boıynsha «Keleshek» biryńǵaı erikti jınaqtaý júıesi aıasynda 59 862 shot ashyldy, onyń ishinde bes jastaǵy 8 046 balaǵa bastapqy bilim berý kapıtaly tólendi. Qarasha aıynyń basynan bastap shottar sany 6177-ge ósti, — delingen vedomstvonyń Kazinform agenttigine bergen jaýabynda.

Jalpy alǵanda, «Keleshek» biryńǵaı erikti jınaqtaý júıesi balalarǵa joǵary bilim alýǵa jáne ata-analarǵa memleket tarapynan járdemdesý arqyly bolashaqta óz balalary úshin bilim alýdyń ózindik strategııasyn qurýǵa múmkindik beredi.

Mınıstrlik aqparatyna qaraǵanda, «Keleshek» júıesi salymshylarynyń kóbeıgeni elimizde memlekettik bilim granttarynyń sanyn azaıtpaıdy.

— «Keleshek» — bul memlekettik qoldaýdyń qosymsha sharasy jáne memlekettik granttar berýdi toqtata turýdy kózdemeıdi. Sonymen qatar, ol tolyǵymen erikti negizde júzege asyrylady, — dep atalyp ótken vedomstvo málimetinde.

Eske salsaq, bıyl qańtar aıynda Memleket basshysy «Keleshek» jınaqtaý júıesi týraly zańǵa qol qoıǵanyn jazǵanbyz. 

Ǵylym jáne joǵary bilim mınıstrligi málimetinshe, memlekettik qoldaýdyń bul sharasy Qazaqstan balalaryna 5 jastan bastap 18 jasqa tolǵanǵa deıin elde jáne shetelde bilim berý qyzmetterine, sonyń ishinde joǵary, sondaı-aq tehnıkalyq jáne kásiptik bilim berý qyzmetterine aqy tóleý úshin qarjy qarajatyn turaqty jınaqtaý maqsatyna arnalǵan. 

Bala 18 jasqa tolǵansha jyl saıyn jarna salyp, memleket pen bankterdiń syıaqylary men bastapqy bilim kapıtalyn alyp, 8-8,5 mıllıon teńge qarajat jınaýǵa bolady.