Keleshek úshin zeınetkerlik jasyn kóterip otyrǵan el bir Qazaqstan ǵana emes - Sh. Myrzahmetov
ASTANA. 17 sáýir. QazAqparat - Keleshek ıgilik úshin zeınetkerlik jasty kóterip otyrǵan el bir Qazaqstan emes. Búgin Parlament Májilisinde «Qazaqstan Respýblıkasynda zeınetaqymen qamsyzdandyrý týraly» zań jobasyn talqylaý barysynda depýtat Shalataı Myrzahmetov osylaı málim etti.
«Bul búkil halqymyzdy tolǵandyryp otyrǵan asa mańyzdy másele. Jańa zańnyń basty maqsaty bolashaq zeınetkerlerimizdiń laıyqty ómirin qamtamasyz etý ekeni túsinikti. Degenmen, eskerte ketetin jaıt, muny jan-jaqty oılastyrý qajet», - deı kele depýtat zań aıasynda qurylatyn Biryńǵaı jınaqtaýshy zeınetaqy qorynyń qyzmetine qatysty máseleler kóterdi. Onyń aıtýynsha, bul baǵytta Ulttyq qor qurýdaǵy tájirıbeler paıdalanylǵany ıgi.
«Zeınet jasyn ósirý kerektigi daý týǵyzbaıdy. Bul qajetti dúnıe. Óıtkeni, keleshek úshin zeınetkerlik jasyn alǵash kóterip otyrǵan bir Qazaqstan emes. Ondaǵan jyldar buryn tıisti qadam jasap, kezeń-kezeńimen zeınet jasyn ósirý arqasynda bul salada esh toqyraýǵa ushyramaǵan memleketter de, kerisinshe kezinde qam jasamaı, ýaqyty kelgende halyqqa salmaq artyp, eki esege artyq shyǵynǵa batqan elder de barshylyq. Endeshe, biz oryn alǵan qatelikterge jol bermeýimiz kerek», - dedi Sh. Myrzahmetov.
Onyń aıtýyna qaraǵanda, búgingi kúni Ekonomıkalyq yqpaldastyq jáne damý uıymyna múshe elderdiń jartysyna jýyǵy zeınetkerlik jasty ulǵaıtyp otyrsa, keıbiri jaqyn ýaqytqa josparlap otyr. «Mysaly, Ulybrıtanııa, Germanııa, AQSh sııaqty damyǵan elderde zeınet jasy, 67 jastan kem emes. Al, Japonııada tipti, 70 jasty quraıdy. Sondyqtan áli kúnge deıin zeınet jasyn arttyrý kerek pe, joq pa degen saýaldyń aınalasynda sóz talastyrǵannan góri, ony qalaı jasaýǵa qatysty kúsh biriktiretin ýaqyt keldi», - dedi Sh. Myrzahmetov.
Eske salsaq, zań jobasynyń basty jańalyǵy áıelderdiń zeınetkerlik jasyn birizdendirý bolyp tabylady. Bul rette zań jobasynda qamtylǵandaı 2014 jyldyń 1 qańtarynan bastap zeınetkerlik jasty jyl saıyn 6 aıǵa ulǵaıta otyryp, birtindep 10 jyldyń ishinde zeınetkerlik jasty kóterýdi júzege asyrý kózdeledi. Sóıtip, 2023 jyldan bastap áıelder men erler úshin zeınetkerlik jas 63-ke teńesedi.
