Keleshek mektepteriniń basshylary men ustazdaryna ádistemelik kómek kórsetý bastaldy
ASTANA. KAZINFORM — Memleket basshysy Qasym-Jomart Toqaevtyń tapsyrmasymen Y. Altynsarın atyndaǵy Ulttyq bilim akademııasy Keleshek mektepterin basqarý modeli retinde aıqyndaldy.
Atalǵan jumys aıasynda qańtar aıynyń 5-8 aralyǵynda elimizdiń ár óńirindegi Nazarbaev Zııatkerlik mektepteri men Bilim-ınnovatsııa lıtseıleri bazasynda ustazdarǵa arnalǵan biliktilikti arttyrý kýrstary men master klastar uıymdastyrylýda. Bul kýrstarda fızıka, hımııa, bıologııa, ınformatıka, jasandy ıntellekt, mektep zerthanasyn paıdalaný daǵdylary, «Adal azamat» biryńǵaı tárbıe berý ádis- tásilderi oqytylady.
Elimizdiń 20 óńirinde ótip jatqan semınarlar «Zamanaýı mektep zerthanasy: muǵalimge arnalǵan praktıkalyq daǵdylar» jáne «Tárbıe ekojúıesi: praktıkalyq sheshimder» taqyryptaryna arnalǵan.
Oǵan 170 Keleshek mektebinen mektep dırektory men olardyń orynbasary jáne fızıka, hımııa, bıologııa, ınformatıka pánderi, STEAM jáne robototehnıka kabınetteriniń 1700-ge jýyq pedagogi qatysyp jatyr. Atalǵan jumystardyń bári de «Keleshek mektepterin» tek jańa ǵımarat retinde emes, mazmuny tereń, sapaly bilim berý ekojúıesi retinde qalyptastyrýǵa baǵyttalǵan.
Esterińizge sala ketsek, elimizde memleket basshysy Qasym -Jomart Toqaevtyń tapsyrmasymen «Keleshek mektepteri» ulttyq jobasy júzege asyrylýda. Ulttyq joba aıasynda 460 myń oqýshyny qamtıtyn 217 mektep salyndy. Onyń 84-i aýylda ashyldy.
Búgingi tańda mektepterdiń 170-inde oqý protsesi bastaldy. Bul ınnovatsııalyq bilim oryndarynyń burynǵy tıptik mektepterden kólemi 15–20%-ǵa úlken, tehnıkalyq jabdyqtalý deńgeıi tórt ese joǵary.
Barlyq keleshek mektepteri fızıka, hımııa, bıologııa, eńbekke baýlý, mýzyka, horeografııa zaly, STEM-zerthanalary men robototehnıka kabınetteri, kovorkıng jáne sport zaldarymen jabdyqtalǵan.
Búginde negizgi maqsat oqýshylardyń turǵylyqty jerine, otbasy jaǵdaıyna qaramastan sapaly bilim alýyna tolyqqandy jaǵdaı jasaý. Bolashaqta «Keleshek mektepteriniń» standarttary, ádistemesi, basqarý júıesi elimizdiń barlyq mektepteriniń damýyna negiz bolady.
Aıta ketelik úıirmelerge tólem jasaý «áleýmettik ámııan» arqyly júzege asyrylmaq.
