Keleshek mektepterinde oqýshylar asyq atyp, toǵyzqumalaq oınaıdy
ASTANA. KAZINFORM – «Adal azamat» birtutas tárbıe baǵdarlamasy aıasynda elimizdegi Keleshek mektepterinde úzilis kezinde ulttyq oıyndar oınaý tájirıbesi júıeli túrde júrgizilip jatyr. Bul bastama oqýshylardyń bos ýaqytyn mazmundy uıymdastyrýdyń jańa tásili retinde engizildi.
Máselen, Astana qalasyndaǵy № 92 mektepte dálizdiń bir bóligi ulttyq oıyndarǵa beıimdelip, qajetti qural-jabdyqtarmen qamtamasyz etilgen. Osynyń nátıjesinde oqýshylardyń ulttyq bolmysty tanýyna jáne óskeleń urpaq arasynda tarıhı-mádenı muralarǵa qurmet qalyptastyrýǵa jol ashyldy.
Sonymen qatar, ulttyq oıyndar arqyly oqýshylardyń oılaý qabileti, logıkasy, qarym-qatynas daǵdylary damyp, ujymmen jumys isteý mádenıeti qalyptasady.
— Ulttyq oıyndar balanyń tanymdyq qabiletin damytyp, seriktestikke, ádildikke jáne toppen jumys isteýge úıretedi. Sonymen qatar, oqýshylar arasynda kommýnıkatsııa men ujymdyq qarym-qatynas nyǵaıady. Búginde tómen, orta jáne joǵary býyn oqýshylary bul bastamaǵa erekshe qyzyǵýshylyq tanytyp otyr. Tipti, mektepishilik jarystar uıymdastyrylyp, úzdikter marapattaldy, — deıdi № 92 mektep dırektorynyń tárbıe isi jónindegi orynbasary Alýa Kızatýllına.
Eske sala keteıik, Y. Altynsarın atyndaǵy UBA-nyń 2025–2026 oqý jylyna arnalǵan ádistemelik-nusqaý hatynda ulttyq oıyndardy úzilis kezinde uıymdastyrý bilim berý uıymdaryna usynym retinde kórsetilip, ony iske asyrýdyń naqty tetikteri aıqyndalǵan bolatyn.
Qujatqa sáıkes, 1-11-synyp oqýshylary asyq atý, toǵyzqumalaq, bestas, hantalapaı, arqan tartys syndy qazaq halqynyń dástúrli zııatkerlik jáne qımyl-qozǵalys oıyndarymen shuǵyldana alady.
Aıta ketelik Almatyda mektep baǵdarlamasyna shańǵy sabaqtary engizilýi múmkin ekenin jazǵan edik.
