Keleshek mektepterinde «12 aıda 12 kitap» jobasy bastalady
ASTANA.KAZINFORM — Qazaqstanda kitap oqý mádenıetin damytý jáne «Zerdeli ult» qalyptastyrý jolyndaǵy mańyzdy bastamalar jalǵasyp jatyr.
Memleket basshysynyń «Kitap oqý mádenıetin damytý jáne zerdeli ult qalyptastyrý jónindegi sharalar týraly» Jarlyǵyn júzege asyrý aıasynda aldaǵy oqý jylynan bastap barlyq Keleshek mektepterinde «12 aıda 12 kitap» jobasy júzege asyrylmaq.
Atalǵan joba QR Oqý-aǵartý mınıstri Juldyz Súleımenovanyń «Keleshek mektepteri» dırektorlarymen kezdesýinde bergen tapsyrmasymen júzege asady. Mınıstr mektep basshylaryna jobany tıimdi júzege asyryp, ony bilim berý úderisimen baılanystyrýdyń ózektiligin atap ótken bolatyn.
Jobanyń negizgi maqsaty — oqýshylar men pedagogterdiń kitap oqýǵa degen qyzyǵýshylyǵyn arttyrý, oqý mádenıetin qalyptastyrý jáne kitap oqıtyn ult tárbıeleý.
Bul bastamaǵa tek oqýshylar ǵana emes, mektep ustazdary da belsendi túrde qatysady. Osy arqyly mektepterde birtutas oqý mádenıetin qalyptastyrý kózdelip otyr.
Qazir pedagogter men oqýshylardyń usynystary negizinde kitaptar tizimi jasaqtalýda. Arnaıy saýalnama júrgizilip, qatysýshylardyń qyzyǵýshylyqtary men suranystary eskeriledi. Nátıjesinde pedagogter úshin kásibı damýǵa arnalǵan zamanaýı ádebıetter, al oqýshylar úshin tulǵalyq damý men dúnıetanymdy keńeıtetin otandyq jáne sheteldik shyǵarmalar irikteldi.
Sonymen qatar, joba qorytyndysy boıynsha eń belsendi qatysýshylar arasynan «Úzdik oqyrmandar» anyqtalyp, marapattalatyn bolady.
Aıta ketelik «Jyldyń 10 oqyrmany» respýblıkalyq jobasy ótkiziledi.
