«Keleshek mektepteri» jobasynyń damý baǵyttary aıqyndaldy
ASTANA. KAZINFORM – Búgin QR Oqý-aǵartý mınıstri Juldyz Súleımenova «Keleshek mektepteriniń» dırektorlarymen kezdesý ótkizip, sala menedjerleriniń usynystary men pikirlerin tyńdap, Keleshek mektepteriniń damý strategııasyn talqylady.
Kezdesý barysynda bilim sapasyn arttyrý men mektep menedjmentiniń zamanaýı standarttaryn engizý máselelerine kóńil bólindi.
Ashyq mıkrofon formatynda ótken pikirtalas barysynda Oqý-aǵartý mınıstri Juldyz Súleımenova atalǵan jobanyń mańyzdylyǵyna qysqasha toqtaldy.
– Memleket basshysy Qasym-Jomart Toqaevtyń tikeleı tapsyrmasymen qolǵa alynǵan bul joba búginde jańa bilim berý modeliniń negizgi irgetasyna aınaldy. Sizder basqaratyn mekemeler bilim sapasy jańa modeliniń platformasy, - dedi mınıstr.
Ol sondaı-aq óz sózinde jasandy ıntellekt pen avtomattandyrý dáýirinde mekteptiń mıssııasy túbegeıli ózgerip jatqanyn aıtty.
– Halyqaralyq básekege qabilettilikti arttyrý – Keleshek mektepteriniń menedjmenti aldynda turǵan basym baǵyttardyń biri. Sol sebepti, aldaǵy ýaqytta mektep bitirýshiler tek ulttyq emtıhandarmen shektelmeı, IELTS jáne SAT sııaqty halyqaralyq standarttarǵa saı bilim deńgeıin dáleldeýi qajet. Osyǵan baılanysty mektepterde akademııalyq aǵylshyn tili, synı oılaý jáne argýmentatsııa daǵdylaryn damytýǵa erekshe kóńil bólinedi. Sonymen qatar STEM jáne ınjenerlik baǵyttardy damytý maqsatynda qoldanystaǵy 180 robototehnıka kabıneti men 150 STEM-zerthana oqýshylar úshin naqty tájirıbelik jáne zertteý alańyna aınalýy tıis. Oqý saýattylyǵy men fýnktsıonaldyq daǵdylardy damytý maqsatynda «Keleshek mektepterinde» oqyrman mádenıetin qalyptastyrý isi qolǵa alynady, - dedi J. Súleımenova.
Mınıstr mektepterde «Bir aıda – bir kitap» qaǵıdatyn engizýdi usyndy. Joba aıasynda barlyq jelilik mektepterde 12 kitaptyń biryńǵaı tizimi túzilip, oqylyp, talqylanady. Bul baǵyt oqýshylardyń debattyq jáne kommýnıkatsııalyq daǵdylaryn damytýǵa kómektespek. Sondaı-aq bul mektepterdegi tárbıe mazmuny dombyra, ulttyq sport jáne beıindi synyptar jumysymen ushtasyp, tulǵanyń rýhanı jáne kásibı tolysýyna jaǵdaı jasaıdy.
Budan buryn Oqý-aǵartý mınıstri Juldyz Súleımenova muǵalim mártebesin qorǵaý jáne bala qaýipsizdigin qamtamasyz etý vedomstvonyń strategııalyq basymdyǵy ekenin aıtqan edi.