«Keleshek mektepteri» jazǵy lagerleri: balalar dron basqarý men IT negizderin meńgerip jatyr
ASTANA. KAZINFORM – Astana qalasyndaǵy №101 Keleshek mektebinde «Atameken» etno-lageri jumys isteıdi. Munda 300-ge jýyq oqýshy etno-patrıottyq, ǵylymı-tehnologııalyq jáne shyǵarmashylyq baǵyttaǵy is-sharalarǵa qatysady, dep habarlaıdy QR Oqý-aǵartý mınıstrliginiń baspasóz qyzmeti.
Baspasóz qyzmetiniń málimetterine qaraǵanda, lager baǵdarlamasy aıasynda balalar ulttyq tarıh pen mádenı murany tanyp-bilip, qazaq tilin ınteraktıvti formatta meńgerip jatyr. Sonymen qatar IT jáne drondardy basqarý negizderimen tanysyp, ekologııalyq mádenıetti qalyptastyrýǵa baǵyttalǵan tájirıbelik sabaqtarǵa qatysady.
Kún saıynǵy baǵdarlama tańǵy jattyǵýdan bastalyp, tanymdyq sabaqtarmen, shyǵarmashylyq jumystarmen jáne túrli kvesttermen jalǵasady.
Pedagogterdiń aıtýynsha, lager oqýshylardyń bos ýaqytyn tıimdi uıymdastyryp qana qoımaı, olardyń qarym-qatynas daǵdylaryn damytýǵa, ulttyq qundylyqtardy dáripteýge jáne jańa qabiletterin ashýǵa múmkindik beredi.
Aıta keteıik, elimizdegi «Keleshek mektepteri» janyndaǵy jazǵy lagerlerde balalardyń demalysyn mazmundy uıymdastyrý jolǵa qoıylǵan. Baǵdarlamalar oqýshylardyń tanymdyq qyzyǵýshylyǵyn arttyrýǵa, shyǵarmashylyq áleýetin damytýǵa jáne zamanaýı daǵdylaryn qalyptastyrýǵa baǵyttalǵan.
Osyǵan deıin elorda mańyndaǵy 2026 jylǵy jazǵy demalys aımaqtaryndaǵy baǵalar týraly jazdyq.
