«Keleshek mektepteri» ulttyq jobasy aıasynda 217 mektep ashyldy
ASTANA.KAZINFORM - Bul týraly Ortalyq kommýnıkatsııalar qyzmeti alańynda 1 maýsym – Halyqaralyq balalardy qorǵaý kúnine oraı uıymdastyrylǵan baspasóz máslıhatynda QR Oqý-aǵartý vıtse-mınıstri Shynar Aqparova aıtty.
– Memleket basshysynyń bastamasymen qala jáne aýyl mektepteri arasyndaǵy alshaqtyqty azaıtý jáne óńirlerde balalardyń sapaly bilim alýy úshin birqatar is-shara qolǵa alyndy. Sonyń biri «Keleshek mektepteri» jelisi quryldy. Osy joba aıasynda 460 orynǵa arnalǵan 217 mektep paıdalanýǵa berildi,-dedi spıker.
Onyń aıtýynsha, bul teńdesi joq mektepter adamı kapıtaldy damytýǵa salynǵan uzaq merzimdi ınvestıtsııa bolyp sanalady.
Sonymen birge ol búginde jalpy bilim beretin mektepterdiń 90%-dan astamynda ınklıýzıvti bilim berý úshin jaǵdaı jasalǵanyn da tilge tıek etti.
– Inklıýzıvti bilim berýdi damytýdyń basym baǵyttary Qazaqstan Respýblıkasynda mektepke deıingi, orta, tehnıkalyq jáne kásiptik bilim berýdi damytýdyń 2023 – 2029 jyldarǵa arnalǵan tujyrymdamasynda kórsetilgen,-dedi vıtse-mınıstr.
Budan bólek Shynar Aqparova mektepterde 1,7 mln oqýshy tegin ystyq tamaqpen qamtamasyz etilgenin atap ótti.
– Onyń ishinde 1-4 synyp oqýshylary túgeldeı jáne jeke sanattaǵy 5-11 synyp oqýshylary bar. Sondaı-aq mektepte tamaqtanýdyń jańa standarty jasaqtaldy. Ol 2025 jyldyń 1 qyrkúıeginen bastap elimizdiń barlyq bilim berý uıymynda qoldanylyp keledi,-dedi ol.
Ratsıondy jańartýmen qatar, tamaqtaný qaýipsizdigi men mektep ashanalarynyń sanıtarııalyq jaǵdaıyna baqylaý kúsheıtilgenin de eske saldy.
Buǵan deıin bıyl qazaqstandyq balalarǵa Ulttyq qordan 900 mln dollardan astam qarajat aýdarylǵany jóninde jazdyq.
