«Keleshek mektepteri»: Ulytaýda 300 oryndyq jańa mektep ashyldy
JEZQAZǴAN. KAZINFORM – 1 qyrkúıek – Bilim kúni jáne jańa 2025–2026 oqý jyly Ulytaý oblysynda aıryqsha qýanyshpen bastaldy. Qala men aýdan mektepterinde alǵashqy qońyraý syńǵyry estilip, jańa bilim saparyna qadam basqan oqýshylarǵa arnalǵan saltanatty jıyndar ótti.
Bıylǵy oqý jylynyń basty jańalyǵy — «Keleshek mektepteri» ulttyq jobasy aıasynda Jezqazǵan qalasynyń Qabanbaı shaǵyn aýdanynda 300 oryndyq jańa № 12 jalpy bilim beretin mekteptiń paıdalanýǵa berilýi.
Zamanaýı úlgide salynǵan bul bilim ordasy jas urpaqtyń sapaly bilim alýyna keń múmkindik beredi. Mekteptiń tabaldyryǵyn attaǵan árbir shákirt úshin bul — úlken armanǵa bastaıtyn mańyzdy qadam. Jańa oqý orny Jezqazǵannyń ıgiligine qyzmet etip, oblystyń bilim berý ınfraqurylymyn edáýir nyǵaıtty.
«Keleshek mektebi» — bul jańa zamanaýı ǵımarat, ıaǵnı keń, jaryq ári qaýipsiz, balanyń damýyna qolaıly bilim keńistigi. Munda kásibı ustazdar ujymy jas urpaqtyń daryny men qabiletin ashýǵa baǵyttalǵan zamanaýı ádistemelerdi qoldanady. Innovatsııalyq oqý ortasy tsıfrlyq quraldarmen, zerthanalarmen, robototehnıka men pándik kabınettermen jabdyqtalǵan. Ár bala túrli úıirmelerge qatysyp, shyǵarmashylyq turǵyda damýǵa múmkindik alady. Sonymen qatar, mektepte kitaphana, akt zaly, ashana, sport zaldary, demalys aımaqtary, oıyn alańdary men shyǵarmashylyq stýdııalar bar. Eń bastysy — ata-anamen seriktestik ornatylyp, ashyq qarym-qatynas pen ár balanyń jeke damýyna baǵyttalǵan birlesken jumys júrgiziledi.
Jańa oqý jylynda Ulytaý oblysynda 4150 búldirshin alǵash ret mektep tabaldyryǵyn attady. Olar úshin bul — bilim men tárbıeniń alǵashqy baspaldaǵy, al ustazdar úshin — jas urpaqty sapaly bilim men ónegeli tárbıege baýlýdaǵy jańa jaýapty kezeńniń bastaýy.
Oqý jyly qarsańynda óńirdegi 7 mektep kúrdeli jóndeýden ótti. Bul jumystar oqý oryndarynyń materıaldyq-tehnıkalyq bazasyn nyǵaıtyp, balalardyń jaıly ári zamanaýı ortada bilim alýyna jaǵdaı jasady.
Aıta keteıik, 2027 jylǵa deıin renovatsııa baǵdarlamasy aıasynda oblystyń jalpy 18 bilim oshaǵy kezeń-kezeńimen jańǵyrtýdan ótedi.