Keleshek mektepteri: Pavlodarda 1200 oqýshyǵa arnalǵan qazaq mektebi ashyldy
PAVLODAR. KAZINFORM — Pavlodarda «Keleshek mektepteri» ulttyq jobasy aıasynda alǵashqy bilim uıasy esigin aıqara ashty. 1200 oqýshyǵa arnalǵan zamanǵa saı mektep memlekettik tilde bilim beredi.
«Dostyq» shaǵyn aýdanynda iske qosylyp otyrǵan jańa qazaq mektebin bul tóńirekti meken etken otbasylar uzaq kútken. 1200 oqýshyǵa shaqtalǵan № 48 mektepke qazirdiń ózinde 1050 bala qabyldanǵan. Oqýshylar áli de úzbeı kelip jatyr. Bıyl munda tek qana birinshi synyptarǵa 164 bala kelgen.
Zamanaýı bilim ordasynyń ashylý saltanatyna arnaıy qatysqan Oqý-aǵartý mınıstri Ǵanı Beısembaev atap ótkendeı, Memleket basshysynyń bastamasymen júzege asyrylyp jatqan «Keleshek mektepteri» ulttyq jobasy aıasynda elimiz boıynsha 460 myń orynǵa arnalǵan 217 jańa formattaǵy mektep salyný ústinde. 1 qyrkúıekte 130 mektep oqýshylar ıgiligine tapsyryldy. «Keleshek mektepteriniń» teń jartysy aýyldyq jerlerde boı kóterip jatyr. Ulttyq jobanyń kózdeıtin mejesi — zamanǵa saı jabdyqtalǵan mektepter arqyly álemdik básekege qabiletti ult keleshekterin tárbıeleý. Buǵan qosa Memleket basshysynyń orta bilim salasynda teń múmkindikter qurý týraly tapsyrmasynyń ońymen oryndalyp jatqanynyń oń kórinisi deýge bolady. Sebebi, barlyq mektepter bir úlgide, tipti ishki árlenýi, bezendirilýi bir qalypta.
— Pavlodar oblysy bıliginiń bilim berý salasyna degen aıryqsha qamqorlyǵy baıqalyp otyr. Ásirese, shaǵyn jınaqty mektepterge oń kózqaras bar. Óńirdegi aýyldyq jerlerde 200-ge jýyq shaǵyn jınaqty mektep tirkelse, solardyń barlyǵyn jańartý maqsat etilip otyr. Bıyl aýyldyq mektepterdi zamanǵa saı jańartýǵa 12 mlrd teńge bólinip, ár mektepke shamamen 300-500 mln teńgeden qarastyrylypty. Bul aýyldarymyzdyń saqtalyp qalýyna, aýyl mektepterindegi bilim salasyn arttyrýǵa úlken kómek. Memleket basshysynyń qoıyp otyrǵany tapsyrmasy da osy, — dedi Ǵanı Beısembaev.
Oblys ákimi Asaıyn Baıhanov jańa mektep jańadan salynyp jatqan «Dostyq» shaǵyn aýdanynyń órkendeýine túrtki bolatyn áleýmettik bastamalardyń biri ekenin jetkizdi.
Aıtýynsha, aýmaqtaǵy ınfraqurylym qarqyndy damyp keledi. Buǵan deıin aýdanda kópqabatty 15 áleýmettik turǵyn úı tapsyrylyp, 5 myńnan astam otbasy baspanaly bolǵan. Aldaǵy ýaqytta aýmaqta 240 balaǵa arnalǵan balabaqsha, emhana, kóptegen oıyn jáne sport alańdaryn turǵyzý josparlanǵan.
— «Dostyqta» buǵan qosa jabyq muz aıdynyn, bir jarym myń kórermen syıatyn kongress-holl, bes myń adamǵa laıyqtalǵan, basseıni bar sport keshenin turǵyzý kózdelgen. Bul jobalardyń barlyǵy turǵyndardyń ómir sapasyn arttyrýǵa baǵyttalǵan ıgi bastamalardyń jalǵasy, — dedi óńir basshysy.
№ 48 orta mektep úsh qabattan, 10 bloktan turady. Birinshi blokta oqýshylarǵa kásiptik baǵdar berýge arnalǵan kabınetter ornalasqan. Ǵımaratta eki sporttyq zal, 245 oryndyq ashana bar.
Mektep dırektory Aınur Bekbaevanyń sózinshe, «Dostyq» shaǵyn aýdanyndaǵy balalardy eseptemegende, jaqyn jerdegi № 21 mektepten 500 oqýshy aýysyp kelipti. Atalǵan mekteptegi qazaq tildi synyptarǵa sabaq beretin pedagogter quramy da jańa bilim uıasyna aýysyp jatyr. Mektep ákimshiligi tolassyz kelip jatqan oqýshylar sanyna qarap, bolashaqta munda bilim alatyndar sany 1500-ge jetip qalýy yqtımal ekenin aıtady.
Aıtyp ótýimiz kerek, qazirgi ýaqytta «Keleshek mektepteri» ulttyq jobasy boıynsha Pavlodar qalasynda 600 oqýshyǵa arnalǵan taǵy bir jańa mektep salynyp jatyr. Onyń qurylysy jyl sońyna deıin aıaqtalady dep kózdelgen.
Buǵan deıin Ertis boıynda mektepterde oryn tapshylyǵy qalaı sheshilip jatqany týraly jazǵan edik.
Jańa oqý jylynda Pavlodarda eki aýylda mektepter ashyldy.