«Keleshek mektepteri»: Qulsaryda salynyp jatqan mekteptiń tóbesi opyrylyp, ortasyna tústi

ATYRAÝ. KAZINFORM — Qazir komıssııa qurylyp, tekserý júrip jatyr. 

Qulsary qalasynda «Keleshek mektepteri» jobasy aıasynda 1200 oryndyq bilim ordasy salynyp jatyr. Qurylys jumystary kezinde sport zalynyń tóbesi opyrylyp, ortasyna tústi. «Samruk-Kazyna Construction» AQ-y Kulsarydaǵy jaǵdaıǵa baılanysty resmı jaýap berdi.

— Atalǵan nysandy «Keleshek mektepteri» ulttyq jobasy aıasynda «Turan Ascent» JShS salyp jatyr. Mektepti paıdalanýǵa berý merzimi — 2025 jyldyń sońy. Aldyn ala málimet boıynsha, qurylys materıaldaryn durys saqtamaý jáne ornalastyrý talaptarynyń buzylýynan osyndaı oqıǵa bolǵan. Atap aıtqanda, sport zalynyń shatyryna shektelgen aýmaqqa salmaǵy 6 tonnadan asatyn materıaldar qoıylyp, konstrýktsııaǵa zaqym keltirgen. Oqıǵaǵa baılanysty tapsyrys berýshi tarapynan basshylyq, tehnıkalyq jáne avtorlyq qadaǵalaý ókilderi kiretin komıssııa quryldy. Sonymen qatar, jobalyq sheshimderge sáıkestigin jáne konstrýktsııalardyń kóterý qabiletin tekserý úshin arnaıy tehnıkalyq saraptama uıymy tartyldy, — dep habarlady «Samruk-Kazyna Construction» AQ-nyń baspasóz qyzmeti.

Saraptama jumystarynan soń ǵana qorytyndy sheshim qabyldanady. Merdiger anyqtalǵan barlyq kemshilikti joıýǵa mindetti.

— «Samruk-Kazyna Construction» AQ «Keleshek mektepteri» ulttyq jobasyn júzege asyrý barysynda sapa men qaýipsizdik talaptaryn qatań saqtaýdy basty qaǵıda etip ustanady, — dep habarlady baspasóz qyzmeti.

Eske salsaq, elimizde bul qurylys aldymen «Jaıly mektep» dep atalyp, keıin joba «Keleshek mektepteri» bolyp ózgerdi. Keıbir óńirde mektep qurylysy baıaý. Máselen Oral qalasy Medkolledj aýdanyndaǵy mektep qurylysy áli júrgizilip jatyr. Negizgi sebebi — merdiger uıym «JJ Construction» JShS-nyń (burynǵy «Jaıyq jaryǵy» JShS) óz mindettemelerin tıisinshe oryndamaýy.