Keleshek mektepteri: dırektorlar STEM strategııasyn bekitti
ASTANA. KAZINFORM — Astanada ótken «Keleshek mektepteriniń tujyrymdamasy: ortaq maqsat, ujymdyq damý» taqyrybyndaǵy strategııalyq konferentsııa aıasynda keleshek mektepteriniń dırektorlary mamandandyrylǵan STEM-bilim berý modelin zerdelep, is-qımyl josparyn ázirledi. Bul týraly QR Oqý-aǵartý mınıstrligi málim etti.
Semınarǵa QR Oqý-aǵartý mınıstrligi, Y. Altynsarın atyndaǵy Ulttyq bilim akademııasy, Zııatkerlik mektepteri, «Bilim-ınnovatsııa» qory jáne «Respýblıkalyq fızıka-matematıka mektebi» ókilderi qatysty.
Semınar sheńberinde «Respýblıkalyq fızıka-matematıka mektebiniń» ókilderi Almaz Kúnǵojın jáne Svetlana Mendiǵalıeva mektepti basqarýdaǵy óz tájirıbelerimen bólisip, bilim mekemelerin damytýdyń naqty formýlasyn usyndy. Tájirıbeli basqarýshylar Keleshek mektepteriniń dırektorlaryn zamanaýı mektepter úshin sapaly bilim, júıeli olımpıadalyq daıyndyq jáne aıqyn strategııalyq jospar mańyzdy degen qorytyndyǵa jeteledi. Zamanaýı mektepterdegi basty nazar oqýshyny tek bilim alýshy emes, ınjenerlik turǵyda oılaı alatyn tulǵa retinde qalyptastyrýda bolýy kerek. Sondyqtan mekteptiń qazirgi deńgeıin baǵalaý, damý baǵytyn belgileý, kedergilerdi anyqtaý jáne osy jumysty alǵa jyljytatyn naqty komandany qalyptastyrý mańyzdy degen sheshimge keldi biliktilik kýrsyna qatysýshy mektep menedjerleri.
— Toptyq jumys barysynda dırektorlar fızıka, matematıka jáne ınjenerlik baǵyttaǵy mektep mıssııasy, tereńdetilgen pán júıesi, halyqaralyq STEM mektepteri qaýymdastyǵymen seriktestik tájirıbesi, túlekterdiń jahandyq kompanııalarda tájirıbe jınaqtaýy jáne tsıfrlyq bilim berý ortasyn damytý tájirıbesimen tanysty. Al, praktıkalyq bólimde bilim mekemeleriniń basshylary óz mektepterinde STEM baǵyttaryn damytýǵa arnalǵan 12 aılyq naqty jol kartasyn ázirledi, — delingen habarlamada.
Aıta keteıik, buǵan deıin «Keleshek mektepteri» jobasynyń damý baǵyttary aıqyndaldy.
