Keleshek mektepteri: Batys Qazaqstanda 6 bilim ǵımaraty paıdalanýǵa beriledi
ORAL. KAZINFORM — Batys Qazaqstan oblysynda «Keleshek mektepteri» ulttyq jobasy aıasynda 2023-2025 jyldary 8 100 oryndyq 9 mektep ǵımaratyn salý josparlansa, sonyń úsheýi iske qosyldy.
Buǵan deıin Oral qalasyndaǵy Derkól kentinde 1 500 oryndyq № 51 mektep qurylysy aıaqtalyp, bıylǵy 9 qańtardan balalar oqı bastady.
Qalanyń «Balaýsa» shaǵynaýdanynda 1 500 oryndyq № 52 mektep boı kóterip, sabaq 13 aqpannan beri júrgizildi.
Sol sekildi Terekti aýdany Podstepnyı aýylynda 1 200 oryndyq mektepti salynyp, munda oqý protsesi 14 sáýirde bastaldy.
Basqarmadan túsken málimetke qaraǵanda, úsh mektep 30 tamyzda paıdalanýǵa berilmekshi. Oral qalasynda Jáńgir han kóshesinde 600 oryndyq № 53 mektepte (merdiger — «Jaıyq jaryǵy» JShS) qurylys-montaj jumystary 67 paıyzǵa oryndaldy.
Báıterek aýdany Baıqonys aýylynda 600 oryndyq mektep qurylysynyń oryndalý kórsetkishi — 82 paıyz.
Báıterek aýdany Dostyq aýylynda 1 200 oryndyq mektep ǵımaraty da (73 paıyz) aıaqtalyp keledi. Merdigeri — «SF Altım» JShS.
«Jaıyq sıtı» JShS Bórli aýdany Pýgachev aýylynda 300 oryndyq mektep ǵımaratyn (oryndalýy — 58 paıyz) 15 jeltoqsanda tapsyrmaqshy.
Aqsaı qalasynda M.Yqsanov kóshesindegi 300 oryndyq № 1 mektep qurylysy (43 paıyz) 30 qazanda máresine jetpekshi. Al 13-shaǵynaýdandaǵy 900 oryndyq № 7 mektepti (25 paıyz) 15 jeltoqsanda qabyldaý josparlanyp otyr.
— Ótken jyly Oral qalasynda bilim berý ınfraqurylymyn damytý qorynyń qarajaty esebinen buryn apatty jaǵdaıda bolǵan № 31 mekteptiń jańa ǵımaraty óz esigin aıqara ashty. Budan bólek, Oral qalasynda daryndy balalarǵa arnalǵan № 8 oblystyq mamandandyrylǵan mektep-lıtseıi ǵımaratyn atalǵan qor qarjysyna bıylǵy jyldyń tórtinshi toqsanynda salyp bitirý kózdelýde. Al Kaztalov aýdanynda 60 oryndyq Qonys mektebiniń ǵımaraty jyl sońyna deıin tabys etilmekshi, — dep habarlady vedomstvodan.
Eske sala keteıik, budan buryn Oralda salynyp jatqan jaıly mektep qurylysy nelikten kesheýildegenin jazǵan edik.
Sondaı-aq Batys Qazaqstanda birinshi synypqa 12 myńǵa jýyq oqýshy qabyldanatyny habarlandy.