Keleshek mektebi: úsh aýysym máselesin sheshken jańa bilim modeli tanystyryldy
ASTANA. KAZINFORM — Astanada «Keleshek mektepteri» ulttyq jobasynyń jańa standarty kórsetildi. №114 mektep oqý kabınetterin zerthana, shyǵarmashylyq stýdııa jáne tsıfrlyq daǵdylar ortalyǵyna aınaldyryp, oqýshyny jan-jaqty damytýǵa baǵyttalǵan jańa bilim modelin usyndy. Bul týraly elorda ákimdiginiń baspasóz qyzmeti málim etti.
Bilim mekemesi úsh aýysym máselesin sheship qana qoımaı, zamanaýı IT, STEM jáne qaýipsizdik júıelerin engizgen. Bul týraly Prezıdent bastamasymen «Keleshek mektepteri» ulttyq jobasy aıasynda salynǵan Astana qalasyndaǵy № 114 orta mektebiniń dırektory Ulbala Toılybaeva aıtty.
Bıyl ashylǵan № 114 mektep elordanyń Almaty aýdanyndaǵy Іlııas Jansúgiruly kóshesinde ornalasqan. Mekteptiń qyzmet kórsetý aımaǵy — Abylaı han, Shákárim Kudaıberdiuly dańǵyldary men Manas, Qaırat Ryskulbekov, Qajymuqan, Mahtýmkýlı kósheleri boıyndaǵy turǵyn úıler.
Bilim oshaǵy basshylyǵynyń sózinshe, № 114 mekteptiń ashylýy aýdandaǵy eki mekteptiń oryn tapshylyǵy máselesin sheshken. Ol — úsh aýysymda bilim bergen Syrbaı Máýlenov atyndaǵy № 37 mektep-lıtseıi men oqýshy tyǵyzdyǵy joǵary № 32 mektep-gımnazııasy. Atalǵan eki mektepten 1500-ge jýyq oqýshy aýysqan. Osylaısha, úsh aýysymdy jáne tyǵyzdyǵy joǵary mekteptiń máseleleri tolyq sheshilgen.
— Keleshek mektebi — tek bilim beretin oryn emes, oqýshyny oılaýǵa, zertteýge, qurastyrýǵa, damýǵa baǵyttaıtyn zııatker orta. Mundaǵy ár kabınet — oqý protsesiniń bir bóligi ǵana emes, oqýshynyń tulǵalyq, akademııalyq jáne tsıfrlyq daǵdylaryn damytatyn kópfýnktsıonaldy keńistik. Qazaq, orys jáne aǵylshyn tili sııaqty pándik kabınetterde ınteraktıvti taqta, panel, elektrondy oqýlyqtar qarastyrylǵan. Matematıka, fızıka, hımııa jáne nanotehnolgııa, bıologııa kabınetteri grafıkalyq planshettermen, tsıfrlyq esepteý quraldarymen, geometrııalyq modeldermen, STEM elementterimen, shahmat, toǵyzqumalaq oıyn quraldarymen jabdyqtalǵan, — dedi mektep dırektory Ulbala Toılybaeva.
Onyń sózinshe, keleshek mektebindegi IT-keńistik tek kompıýter synyby emes, ol baǵdarlamalaý ortalyǵy, kıberqaýipsizdik zerthanasy, vırtýaldy realdylyq (VR/AR) quraldary, 3D-grafıka jáne modeldeý sııaqty múmkindikterdi usynady.
– Oqýshylarymyzdyń fızıologııalyq damýy úshin sońǵy úlgidegi quraldar men sporttyq qurylǵylarmen jabdyqtalǵan eki úlken, eki kishi sportzal bar. Odan bólek balanyń bos ýaqytyn uıymdastyrýǵa bolatyn, demalysyn sapaly etetin rekreatsııalar men kovorkıng zonalar taǵy bar. 50 oryndyq kitaphana mýltımedııalyq quraldarmen qamtamasyz etilgen. Yńǵaıly kitap oqıtyn aýmaqtarmen jabdyqtalǵan. Kitapty alyp oqý Face ID arqyly júzege asady, — dedi mektep dırektory.
Sonymen qatar № 114 mektep STEM, robototehnıka kabınetterimen, LEGO, Arduino, Micro: bit platformalarymen, 3D-prınterlermen, ınjenerlik modeldermen, konstrýktorlarmen, elektrondyq quraldarmen, robottarmen jáne drondarmen jabdyqtalǵan. Bul oqýshynyń ınjenerlik oılaýyn damytatyn zerthana deýge bolady.
– Mektepte sport baǵytynda tegin fýtbol, basketbol, asyq atý, tennıs, voleıbol, toǵyzqumalaq, bes tas sektsııalary isteýde. QR Oqý-aǵartý mınıstrligi „Ulttyq-praktıkalyq dene tárbıesi“ ortalyǵymen birlesip gandbol, dzıýdo sektsııalary ótýde. Shyǵarmashylyq baǵyttaǵy hor, dástúrli án, teatr, qolóner, ádebı óner, stıl men estetıka úıirmeleri oqýshylardyń bos ýaqytyn tıimdi uıymdastyrady, — dedi Ulbala Toılybaeva.
Ǵımaratta qaýipsizdik máselesi de jolǵa qoıylǵanyn aıtady mamandar.
– Mektepte kiretin eki negizgi esik bar. Bastaýysh blokta 1-4-synyp oqýshylary kiretin esik, orta jáne joǵary býynda bólek kiretin esik qarastyrylǵan. Ol esikter mektepke kelýshilerdi tirkeıtin vahta men qaýipsizdik týrnıketterimen jabdyqtalǵan. Týrnıketterde Face ID qurylǵylar bar — oqýshylar men ustazdar, qyzymetkerler Face ID arqyly ótedi. Odan bólek evaokýtsııalyq shyǵý esikteri, antıpanıkalyq júıeler, órtke qarsy júıeler, beınebaqylaý júıesi qoıylǵan. Kedergisiz orta qurý maqsatynda jolaýshylar lıfti, pandýstar bar, — dedi Ulbala Orazáliqyzy.
Aıta keteıik, 1,4 mln-nan astam «Jeke qaýipsizdik» sabaǵy ótkizilip, oqýshylardyń 95%-y oń pikir bildirdi.