«Keleshek» baǵdarlamasyna barlyq bank qatysa alady – Saıasat Nurbek
ASTANA. KAZINFORM – Ǵylym jáne joǵary bilim mınıstri Saıasat Nurbek kóktemde «Keleshek» baǵdarlamasyna qatysty aqparattyq túsindirýi is-sharalarynyń bastalatynyn aıtty.
«Kóktemnen bastap biz aqparattyq naýqandy bastaımyz. Onyń barysynda 1 jáne 2, odan kóp balaǵa qarjyny durys jınaqtaý strategııasyn qalaı tańdaýǵa bolatyndyǵyn naqty túsindiremiz. Baǵdarlama balalarǵa bolashaqta joǵary bilim alýǵa kepildik beredi», - dedi Saıasat Nurbek Úkimet otyrysynan keıin ótken baspasóz máslıhatynda.
Sondaı-aq, vedomstvo basshysy «Keleshek» baǵdarlamasyna barlyq banktiń qatysa alatynyn aıtty.
«Ulttyq bank aıqyndaıtyn qarjylyq turaqtylyq boıynsha qatań talaptarǵa saı keletin barlyq bankter qatysýǵa múmkindik alady», - dep tolyqtyrdy mınıstr.
Eske sala ketsek, ótken jyly Memleket basshysy Qasym-Jomart Toqaev halyqqa joldaýynda 5 jastan asqan balalarǵa arnalǵan «Keleshek» atty biryńǵaı erikti jınaqtaý júıesin engizýdi tapsyrǵan edi.
