«Keleshegińdi oıla» aktsııasy elordalyqtardy memlekettik baǵdarlamalar jóninde aqparattandyrady
ASTANA. 31 mamyr. QazAqparat - Búgin «Han-Shatyr» saýda jáne oıyn-saýyq ortalyǵynda Astana turǵyndaryn áleýmettik qoldaý sharalary týraly aqparattandyrýǵa baǵyttalǵan «Keleshegińdi oıla!» atty aktsııa bastaldy. Qajetti aqparat alýǵa nıet bildirgen azamattar 31 mamyr - 2 maýsym aralyǵynda mamandarǵa jolyǵyp, oqytý jáne jumysqa ornalastyrý, zeınetaqy tólemderi, áleýmettik qorǵaý, qoljetimdi turǵyn úı máseleleri boıynsha tolyqqandy keńes ala alady.
QR Eńbek jáne halyqty áleýmettik qorǵaý mınıstrliginiń qoldaýymen uıymdastyrylǵan aktsııa elorda turǵyndaryn azamattardyń ómirin jaqsartýǵa baǵyttalǵan memlekettik baǵdarlamalar týraly qulaqtandyrý úshin qolǵa alynǵan.
«Elimizde halyqty áleýmettik qoldaýdyń tetikteri kóp. Biraq, sony halyq bile bermeıdi. Sol úshin, osy aktsııany uıymdastyryp otyrmyz. Bul jerde ár salanyń mamandary otyr. Túrli uıymdardyń ókilderi bir jerge jınalyp, halyqqa qyzmet kórsetedi. Sharanyń mánisi osynda. Árbir adam keleshekte jaqsy zeınetaqy alǵysy keledi. Endeshe, qazirden jınaqtarymyzdy tekserip, bolashaq zeınetaqymyzdy oılaıyq. Ózin syılaǵan adam - konverttegi jalaqydan bas tartyp, taza eńbekaqy alýy kerek. Jınaqty kóp jınaýy talpynýy qajet», - dep atap ótti QR Eńbek jáne halyqty áleýmettik qorǵaý mınıstrliginiń jaýapty hatshysy Aıda Qurmanǵalıeva aktsııany asha otyryp.
QR EHÁQM bastamasy án jáne sport salasyndaǵy qazaqstandyq juldyzdar tarapynan qoldaý tapty. Olımpııada jeńimpazy Serik Sápıev «Jumyspen qamtý-2020» memlekettik baǵdarlamasynyń mańyzdylyǵyna toqtaldy.
«Memlekettiń aýyl jastaryn qoldaǵany óte jaqsy. Aýyldyń damýy, ásirese, sporttyq jáne bilim berý nysandarynyń qurylysy jáne jóndelýi aýyl balalarynyń tolyqqandy azamat bolyp qalyptasýyna múmkindik bermek. Árkimniń bıik belesterdi baǵyndyrýǵa múmkindigi bar, sondyqtan ózine senip, baqytty bolashaqqa umtylýy qajet», - dep atap ótti ol.
Ulttyq paraolımpııalyq komıtettiń vıtse-prezıdenti Baqyt Syzdyqova memlekettik bastamalarǵa joǵary baǵa berdi.
«Memlekettiń «halyqtyń aldyna shyqqanyna» rıza boldym. Men óńirlerge jıi shyǵyp turamyn, halyqtyń memlekettik baǵdarlamalarǵa qyzyǵýshylyǵy joǵary ekenin jaqsy bilemin. Sondyqtan, osyndaı aktsııalardy elimizdiń túkpir-túkpirinde ótkizse de artyq bolmaıdy dep esepteımin. Osy ispetti sharalar azamattardyń jaýapkershiligin arttyrar edi. Ókinishke oraı keıbir jastar bir kúnmen ómir súredi. Olardy osy bastamanyń ataýy aıtyp turǵandaı, keleshekti oılaýǵa shaqyramyn», - dedi B.Syzdyqova
Sharaǵa «Memlekettik zeınetaqy tóleý jónindegi ortalyǵy» RMQK, Astana qalasy ákimdiginiń «Jumyspen qamtý ortalyǵynyń» RMM, «Astana qalasynyń Jumyspen qamtý jáne áleýmettik baǵdarlamalar Basqarmasynyń» MM, «Qazaqstan turǵyn úı qurylys jınaq banki» AQ mamandary qatysýda.
