Kelesi jyly Jambyl oblysynda eki jańa sý qoımasynyń qurylysy bastalady
ASTANA. KAZINFORM – 2028 jylǵa deıingi sý salasyn damytý jónindegi keshendi josparǵa sáıkes, Jambyl oblysynda 10 jańa sý qoımasy salynyp, jumys istep turǵan 3 sý qoımasy rekonstrýktsııadan ótedi.
Sondaı-aq 45 gıdrotehnıkalyq nysanǵa kópfaktorly zertteý júrgizý josparlanǵan.
Mınıstrlik kelesi jyly Aqmola jáne Qalǵuty sý qoımalarynyń qurylysyn bastaýdy josparlap otyr. Sonymen qatar Teris-Aşybulaq jáne Qaraqońyz sý qoımalary rekonstrýktsııadan ótedi. Al oblys ákimdigi 7 jańa sý qoımasynyń jobalaý-smetalyq qujatyn ázirleýmen aınalysyp jatyr.
Qazirgi ýaqytta Islam damý bankiniń qoldaýymen uzyndyǵy 415 shaqyrym bolatyn 76 kanaldy jańǵyrtý jobasy ázirlenip jatyr. Bul shara 24 877 gektar jerge sý jetkizýdi jaqsartady.
Sonymen qatar óńirde 23 sýarý kanalyn rekonstrýktsııalaý jobasy aıaqtalýǵa jaqyn. Nátıjesinde 19 746 gektar egistik alqapqa sý berý jaqsarady. Bıyldyń sońyna deıin uzyndyǵy 103 shaqyrymnan asatyn 5 kanaldy rekonstrýktsııalaý jobasyn aıaqtaý josparlanyp otyr.
«Sý sharýashylyǵy ınfraqurylymyn jańǵyrtý – Memleket basshysynyń mınıstrlikke júktegen negizgi mindetterdiń biri. El boıynsha gıdrotehnıkalyq nysandardy salý jáne rekonstrýktsııalaý josparyn iske asyrý úshin jeke ınvestıtsııalar tartylýda. Sonymen qatar sý resýrstaryn basqarýdy avtomattandyrý jáne tsıfrlandyrý salasynda jetekshi kompanııalarmen kelissózder júrgizilip jatyr. Degenmen sýdy únemdeýge tek memleket qana emes, tutynýshylardyń ózderi de úles qosýy qajet. Ol úshin sý únemdeıtin tehnologııalardy engizip, ylǵaldy az qajet etetin daqyl túrlerin ósirýge kóshý mańyzdy», – dedi Sý resýrstary jáne ırrıgatsııa mınıstri Nurjan Nurjigitov.
Aıta keteıik, Shúlbi sý qoımasynan 6,32 mlrd tekshe metr sý jiberildi.