Kelesi jyly jalpy ishki ónim ósimi 5,6 paıyz bolady — mınıstrlik
ASTANA. KAZINFORM –2025 jyly jalpy ishki ónimniń naqty ósýi 5,6 paıyzdy quraıdy. Bul týraly Májiliste Ulttyq ekonomıka vıtse-mınıstri Azamat Ámrın aıtty.
«Sizderdiń qaraýlaryńyzǵa eldiń 2025-2029 jyldarǵa arnalǵan áleýmettik-ekonomıkalyq damý boljamy jáne „Qazaqstan Respýblıkasynyń Ulttyq qorynan 2025 — 2027 jyldarǵa arnalǵan kepildendirilgen transfert týraly“ Zańnyń jobasy engiziledi. Boljamdy qalyptastyrýdyń negizine munaıdyń baǵasy barreline 75 AQSh dollary jáne dollardyń eseptik baǵamy 470 teńge bolǵandaǵy bazalyq stsenarııi alyndy. Boljam boıynsha 2025 jyly jalpy ishki ónimniń naqty ósýi — 5,6 paıyzdy, 5 jyl ishinde jalpy ishki ónimniń ortasha jyldyq ósýi 5,4 paıyzdy quraıdy. Ataýly jalpy ishki ónim 2025 jylǵy 150,8 trln teńgeden 2029 jyly 234,2 trln teńgege deıin ósedi», — dedi vıtse-mınıstr.
Onyń atap ótýinshe, ekonomıkanyń barlyq salasynda ósim kútiledi.
Máselen, ónerkásiptegi ortasha jyldyq ósý qarqyny — 4,1 paıyz, onyń ishinde óńdeý ónerkásibinde — 5,8 paıyzdy, taý-ken óndirý ónerkásibinde 2,9 paıyzdy quraıdy.
Aýyl sharýashylyǵyndaǵy ortasha jyldyq ósim — 5,3 paıyz, qurylysta — 9,3 paıyz, kólik qyzmetterinde — 8,2 paıyz jáne saýdada 7,1 paıyz bolady.
«Munaı óndirý kólemi 2025 jyly 97,2 mln tonnadan 2029 jyly 104,8 mln tonnaǵa deıin ulǵaıady. Taýarlardyń eksporty 2025 jyly 82,3 mıllıard AQSh dollardan 2029 jyly 90,0 mıllıard AQSh dollarǵa deıin ósedi dep boljanady. Import 61,3 mıllıard AQSh dollardan 67,5 mıllıard AQSh dollarǵa deıin ósedi. Inflıatsııa deńgeıi 2025 jyly 5,5 jáne 7,5 paıyz, 2026 jyly 5 jáne 6 paıyz aralyǵynda aıqyndaldy, keıinnen 2027-2029 jyldary 5 paıyzǵa deıin tómendeýi kútiledi», — dedi Azamat Ámrın.
