Kelesi jyly shamamen bir mıllıon sırııalyq óz eline oralýy múmkin — BUU

ASTANA. KAZINFORM — Aldaǵy eki jylda elge oralǵandar sany tórt mıllıonnan asady, dep habarlaıdy Kazinform agenttigi Anadolu Ajansı-ǵa silteme jasap.

Basylymnyń málimetinshe, ótken jylǵy 8 jeltoqsanda Bashar Asad rejımi qulatylǵannan beri Sırııaǵa shamamen 1,3 mln sırııalyq qaıtyp kelgen. Al kelesi jyly taǵy bir mıllıonǵa jýyq adamnyń oralýy kútilip otyr. Bul týraly BUU-nyń Bosqyndar isi jónindegi Joǵarǵy komıssary basqarmasynyń (BUU BJKB) Sırııadaǵy ókili Gonsalo Vargas Losa málimdedi.

Losa Jenevada BUU BJKB men Shveıtsarııa úkimeti birlesip uıymdastyrǵan «Bosqyndar jónindegi jahandyq forýmnyń ilgerileýin ekinshi jahandyq baǵalaý» atty kezdesýge qatysyp, Anadolu Ajansı tilshisiniń Sırııadaǵy jaǵdaıǵa qatysty suraqtaryna jaýap bergen.

Onyń aıtýynsha, ol Asad rejımi qulaǵanǵa deıin birneshe aı buryn Sırııada bolyp, jańa ákimshiliktiń bılikke kelýine kýá bolǵan. Losa eldegi «qorqynysh ahýalynyń óte jyldam joǵalyp, onyń ornyn úmit basqanyn» atap ótti.

Losanyń sózinshe, byltyrǵy 9 jeltoqsanda ol óz komandasymen birge Lıvan shekarasyna baryp, 14 jyldan astam ýaqytqa sozylǵan májbúrli qýǵynnan keıin óz betterimen otanyna oralyp jatqan sırııalyqtardy kórgen. Ol sondaı-aq «eline jetken kóptegen adamdar qýanyshtan týǵan jerdiń topyraǵyn súıgenin» de atap ótken.

Aıta keteıik, Sırııadaǵy tutqıyl shabýyldan AQSh-tyń eki áskerı qyzmetkeri men azamaty opat boldy.

Sondaı-aq sırııalyqtar Sırııa Asad rejıminiń qulaǵanyna bir jyl tolǵanyn atap ótti.