Kelesi jyly salyq bereshegi 86 500 teńgeden asqandarǵa ǵana ósimpul esepteledi

ASTANA. KAZINFORM – Memlekettik kirister komıteti Aýdıt departamenti bereshekpen jumys basqarmasynyń basshysy Aryn Qaısar jańa Salyq kodeksi boıynsha salyq bereshegin saralap óndirý qalaı iske asyrylatynyn aıtty.

- Kelesi jyldan bastap qoldanysqa enetin Salyq kodeksi boıynsha, salyq bereshegin saralanǵan tásilmen qaıtarý tártibi engiziledi. Salyq bereshegi 20 aılyq eseptik kórsetkishten (86 500 teńgeden) tómen azamattarǵa ósimpul eseptelip, eskertpe jiberiledi. Al 20 AEK-ten 45 AEK-ke (194 625 teńgege) deıingi aralyqtaǵy bereshegi barlarǵa ósimpulmen birge habarlama jiberiledi. 20 AEK-ke deıingilerge eskertpe barsa, bularǵa habarlama joldanady. Habarlama barǵannan keıin bereshekti qaıtarýǵa 10 kún beriledi. Osy 10 kúnniń ishinde bereshek tólenbese, esepshoty men kassalyq shyǵys operatsııalar toqtatylyp, ınkassalyq úkim qoıylady, - dedi ol.

Al salyq bereshegi 45 AEK-ten assa, joǵaryda atalǵan sharalardan bólek múlkin tárkileý, ony satý, debıtorlarmen jumys isteý, eń aıaǵynda bankrot dep tanýǵa deıingi jazalar qoldanylady.

Eske salsaq, Memleket basshysy Qasym-Jomart Toqaev bıylǵy Joldaýynda salyq bereshegi barlardyń banktegi esepshotyn tolyq buǵattamaýdy tapsyrǵan bolatyn.

- Bereshek somasy tym kóp bolǵan jaǵdaıda, kepilge múlik qoıýdy talap etpeı, qaryzdy bólip tóleýge múmkindik bergen jón. Josparǵa saı tekserý tásilinen birjola bas tartýǵa tyrysý kerek, - degen edi Prezıdent.