Kelesi jyly Qazaqstandaǵy ortasha zeınetaqy qansha bolady

Eńbek jáne halyqty áleýmettik qorǵaý mınıstri Svetlana Jaqypova kelesi jyly ortasha zeınetaqy mólsheri qansha bolatynyn túsindirdi, dep habarlaıdy Kazinform.

«Bizde bazalyq zeınetaqy tólemi ulǵaıyp keledi. Bıyl bazalyq zeınetaqynyń eń tómengi mólsheri eń tómengi kúnkóris deńgeıiniń 54%-dan 60% deıin artty. Kelesi jyldan bastap biz eń tómengi shekti taǵy 5% kóteremiz. Oǵan qosa, ınflıatsııa deńgeıine ındeksteý júzege asyrylady. 1998 jylǵy 1 qańtarǵa deıingi eńbek ótili úshin tólenetin yntymaqty zeınetaqy jáne 2024 jylǵy 1 qańtarda taǵaıyndalǵan tólemderi bar barlyq zeınetkerlerge ındeksteý 7%-ǵa, jalpy 9%-ǵa júrgiziledi», - dedi Svetlana Jaqypova.

Eńbek mınıstriniń aıtýynsha, qazaqstandyqtardyń ótken jylǵy ortasha zeınetaqysy 120 myń teńge bolsa, kelesi jyly – shamamen 130 myń teńge bolady.

Sonymen birge, 1 qańtardan bastap, zııandy óndiriste jumys isteıtinderge 208 myń teńgege deıin arnaıy tólemaqy tólenedi.