Kelesi jyly Qazaqstan óńirlik ekologııalyq sammıt ótkizedi
ASTANA. KAZINFORM — Memleket basshysy Qasym-Jomart Toqaev Astana halyqaralyq forýmynda atom energetıkasynyń Qazaqstandaǵy róline toqtaldy.
— Álemdegi ýran qorynyń 40 paıyzy Qazaqstannyń enshisinde. Sondyqtan elimiz atom energetıkasyn damytýdy ulttyq strategııanyń basym baǵyty retinde qarastyrady. Alaıda klımat daǵdarysy sheshilmeı, eshqandaı ornyqty damý bolmaıdy. Ortalyq Azııa — planetadaǵy klımat ózgeristerine osal óńirlerdiń biri. Munda ǵalamdyq jylyný deńgeıi álemdegi ortasha kórsetkishpen salystyrǵanda eki ese joǵary. Atalǵan qıyndyqtardy eńserý úshin óńirlik turǵydan úılestirilgen, pragmatıkalyq baǵyttaǵy klımat kún tártibin ilgeriletýge beıilmiz. Onyń aıasynda elimiz birqatar halyqaralyq uıymǵa múshe bolyp, kelisimderge qosyldy, — dedi Prezıdent.
Qasym-Jomart Toqaev kelesi jyly Qazaqstan BUU-men birge Óńirlik ekologııalyq sammıtin ótkizetinin málim etti.
— Bul alań Ortalyq Azııa elderiniń strategııasyn jahandyq maqsatpen ushtastyrýdy kózdeıdi. Qazaqstan ózara qurmet pen aımaqtyq yqpaldastyqty arqaý etken Ortalyq Azııanyń turaqtylyǵy berik, yntymaǵy bekem, bolashaǵy aıqyn bolǵanyn qalaıdy. Eki aı buryn BUU Bas Assambleıasy Almatyda Ortalyq Azııa men Aýǵanstan úshin Ornyqty damý maqsattary jónindegi BUU-nyń aımaqtyq ortalyǵyn qurý týraly qarardy resmı túrde qabyldady. Bul — bizdiń kópjaqty damýǵa úles qosqan mańyzdy jetistigimiz. Atalǵan ortalyq birlesken jobalarǵa qoldaý kórsetip, tehnıkalyq saraptamalardy qamtamasyz etedi jáne halyqaralyq yntymaqtastyqty úılestiredi, — dedi Memleket basshysy.
Aıta keteıik, elordada Memleket basshysy Qasym-Jomart Toqaevtyń qatysýymen Astana halyqaralyq forýmy ótip jatyr.
Forýmǵa 7 000-nan astam qatysýshy tirkelgen. Eýropa, Ortalyq Azııa, Taıaý Shyǵys pen Afrıka elinen BUU, AAU, HKU jáne DZMU sııaqty jetekshi halyqaralyq uıymdardyń atynan 160-tan astam spıker shaqyrylǵan. Eki kún boıy olar túrli salanyń sarapshylarymen birlesip, memleketaralyq yntymaqtastyq modelin, jańa jahandyq áriptestik qurýdyń keleshegin talqylaıdy.
Buǵan deıin forýmnyń mártebeli meımandar qatarynda Rýanda Respýblıkasynyń Prezıdenti Pol Kagame, Albanııa Premer-Mınıstri Edı Rama, Horvatııa Respýblıkasynyń Premer-Mınıstri Andreı Plenkovıch, Qatar Premer-Mınıstri — Syrtqy ister mınıstri sheıh Muhammed ben Abdýlrahman Ál Tánı bar ekeni habarlanǵan bolatyn.