Kelesi jyly qasqyr men shıbórini qaı aımaqtarda atýǵa bolady
ASTANA. KAZINFORM - Orman sharýashylyǵy jáne janýarlar dúnıesi komıteti 2026 jylǵa arnalǵan Qazaqstan aýmaǵynda qasqyr men shıbóri sanyn retteýge qatysty bıologııalyq negizdeme ázirlengenin habarlady.
Komıtettiń málimetinshe, 2026 jylǵy 5 qańtar saǵat 10:00-den bastap sanyn retteýge jatatyn janýarlardy, atap aıtqanda qasqyr men shıbórini aýlaýǵa ruqsat alý múmkindigi qoljetimdi bolady.
Bıologııalyq negizdemege sáıkes, janýarlar sanyn retteý merzimi 2026 jylǵy 31 jeltoqsanǵa deıin belgilengen.
- Sonymen qatar Aqmola, Batys Qazaqstan, Qaraǵandy, Qostanaı, Mańǵystaý, Pavlodar jáne Ulytaý oblystarynda qasqyr men shıbórini aýlaýǵa ruqsat tek úı janýarlaryna shabýyl jasalǵany dáleldengen jaǵdaıda ǵana beriledi, - dep eskertti vedomstvodan.
Janýarlar sanyn retteýge ruqsat alý tártibi Ekologııa, geologııa jáne tabıǵı resýrstar mınıstriniń 2020 jylǵy 30 jeltoqsandaǵy №347 buıryǵymen bekitilgen «Sany retteýge jatatyn janýarlar túrlerin alyp qoıýǵa ruqsat berý» memlekettik kórsetiletin qyzmet qaǵıdalaryna sáıkes júzege asyrylady.
Qazirgi tańda atalǵan qyzmet tolyqtaı avtomattandyrylǵan jáne elicense.kz
veb-portaly arqyly kórsetiledi.
Aıta keteıik, buǵan deıin Qazaqstanda aıý men qasqyrdy atýǵa qatysty lımıt ózgerýi múmkin ekeni habarlanǵan bolatyn.