Kelesi jyly qarjy salasynda qandaı ózgerister bolady
ALMATY. KAZINFORM – Keler jyly elimizde bank salasyn retteıtin jańa zań qabyldanady. Bul qadam bankaralyq yntymaqtastyqty kúsheıtýge baǵyttalyp otyr. Bul týraly Ulttyq banktiń departament dırektorynyń orynbasary Erjan Ahmetáli málimdedi.
Aıtýynsha,zań jobasynda ekonomıkalyq belsendilikti yntalandyrý, tsıfrlyq aktıvter men qarjy tehnologııalaryn retteý máseleleri basty nazarda bolady. Osy baǵyttaǵy teńgerimsizdikti joıý úshin teńdestirilgen salyq saıasaty júrgizilmek.
Bank týraly jańa zańnyń aıasynda tsıfrlyq ınfraqurylymdardyń mártebesi belgilenetin bolady. Bul júıege búkil qarjy naryǵyn qatysýshylary qosylmaq.
«Qarjy naryǵyn tsıfrlandyrý boıynsha, úlken jetistikterge qol jetkizdik. Bul bárine málim. Osy salada kóshbasshy bolyp qalýǵa tıispiz. Sondyqtan aldaǵy bes jylda Qarjy naryǵyn retteý jáne damytý agenttigimen jáne qarjy naryǵyna qatysýshylarmen birge tsıfrlandyrý strategııasyn ázirleımiz», – dedi Erjan Ahmetáli.
Ulttyq banktiń departament dırektorynyń orynbasary Erjan Ahmetáli qarjygerler kongresinde tsıfrlyq teńge týraly da málimet berdi.
«Qarjygerler jyl saıyn ótkiziletin kongreste ózekti máselelerdi talqylaýǵa bas qosyp otyr. Jıynda ekonomıkany lıberalızatsııalaý, ekonomıkalyq ósimdi arttyrý máseleleri talqylandy.Tsıfrlyq teńgemen qatar, banktik platformalar men tólem júıeleriniń bankaralyq ınfraqurylymdarynyń jańa elementteri iske asyrylatyn bolady»,- dedi ol.
Sondaı-aq spıker bankterdiń negizinde marketpleısterdiń, qolma- qol aqshasyz tólem júıeleriniń jaqsy damyp jatqanyn tilge tıek etti.
