Kelesi jyly feldsherlerdiń jalaqysyn kóterý úshin qosymsha 10 mlrd teńge qajet — DSM

ASTANA. KAZINFORM — 2026 jyly feldsherlerdiń jalaqysyn kóterý úshin qosymsha 10 mlrd teńge qajet. Bul týraly búgin Májilistiń jalpy otyrysynan keıin Densaýlyq saqtaý birinshi vıtse-mınıstri Tımýr Sultanǵazıev aıtty.

— Rasymen de feldsherler másele kóterip jatyr. Ásirese, ótkendegi jaǵdaıdan keıin. Densaýlyq saqtaý mınıstrligi osy jyly jedel járdem júıesine qosymsha 5 mlrd teńgedeı qarajat bóldi. Kelesi jyly da jalaqylaryn kóterý úshin erejelerge ózgertýler engizý máselesi talqylanyp jatyr, — dedi vıtse-mınıstr BAQ ókilderiniń saýalyna oraı.

Onyń aıtýynsha, feldsherlerdiń jalaqysy qansha paıyzǵa ósetini bıýdjetten bólinetin qarajatqa baılanysty bolmaq.

— Kelesi jyly feldsherlerdiń jalaqysyn kóterý úshin qosymsha 10 mlrd teńgedeı qarajat kerek, — dedi Tımýr Sultanǵazıev.

Aıta keteıik, buǵan deıin Shý, Temirtaý jáne Taldyqorǵan qalalarynyń feldsherleri Densaýlyq saqtaý mınıstrine úndeý joldap, tómen jalaqy men aýyr eńbek jaǵdaıyna nazar aýdarýdy suraǵan edi.

Buǵan deıin Densaýlyq saqtaý mınıstrligi jedel járdem qyzmetkerlerin qosymsha ózin-ózi qorǵaý buıymdarymen qamtamasyz etý boıynsha shara qabyldaýdy oılastyryp otyrǵanyn jazǵan edik.