Kelesi jyly BQO-nyń barlyq aýdan ortalyǵynda sport keshenderi bolady

Batys Qazaqstan oblysynda iri aýyldarda sport keshenderi boı kóteretin bolady. Bul týraly Kazinform tilshisine oblys ákimi Narıman Tóreǵalıev málim etti.

Óńir basshysynyń aıtýynsha, Memleket basshysy Qasym-Jomart Toqaevtyń tapsyrmasyna sáıkes barlyq aýdan ortalyqtaryn dene shynyqtyrý-saýyqtyrý keshenderimen qamtý jumystary aıaqtalyp keledi.

Aıtalyq, 2023 jyly Aqjaıyq aýdanynyń Chapaev pen Taıpaq aýyldarynda osyndaı keshender paıdalanýǵa berildi. 2024 jyly Qaztalov pen Tasqala aýdandarynda taǵy eki ǵımarat salynady. Sonda aýdan ortalyqtary sport keshenderimen tolyq qamtylady.

Prezıdenttiń oblysqa sapary kezinde bergen tapsyrmasyna sáıkes Oral qalasynda kópfýnktsıonaldy sport kesheni turǵyzylyp jatyr. Qazirgi kezde jer qazý jumystary aıaqtalyp, irgetasy quıylýda. Bul oblystaǵy eń iri sport kesheni bolmaq.

Sol sekildi «Jastar» stadıony aýdanynda múmkindigi shekteýli adamdarǵa arnalǵan dene shynyqtyrý-saýyqtyrý keshenin turǵyzý kózdelgen. Aldaǵy jyly P.Atoıan atyndaǵy stadıon kúrdeli jóndeletin bolady.

«Sonymen qatar oblysta iri aýyldarda modýldik sport zaldaryn salý oılastyrylyp jatyr. Mysaly, «Qazaqstan halqyna» qoǵamdyq qorynyń qarjysy esebinen 2024 jyly Báıterek aýdanynyń Baıqonys, Mahambet, Bókeı ordasynyń Bısen, Terektiniń Dolınnyı aýyldarynda osyndaı ǵımarattar boı kóteredi. Syrym aýdanynyń Buldyrty, Tasqalanyń Mereı, Báıterektiń Darııan, Terektiniń Aqjaıyq aýyldary turǵyndaryna da mundaı múmkindik jasalady. Jýyrda shalǵaıdaǵy Bókeı ordasy aýdany Han ordasy aýylynda bolǵan kezde onda 2025 jyly sport kesheni salynatynyn jetkizdim. Oǵan qosa barlyq mektepterdiń sport zaldary keshkisin jastardyń dene shynyqtyrýmen aınalysýy úshin ashyq bolady. Mundaǵy maqsat – halyqtyń sportpen tolyqqandy shuǵyldanýy úshin qajetti jaǵdaı jasaý. Kúni búgin 275 myńnan astam adam nemese oblys halqynyń 39,6 paıyzy sportpen aınalyssa, 2029 jyly 50 paıyzǵa jetkizý kózdelip otyr», – dedi N.Tóreǵalıev.

Oblys basshysy QR Týrızm jáne sport mınıstrligimen kelise otyryp, olımpıadalyq sport túrlerin damytýǵa basa kóńil bólinetinin jetkizdi. Sonymen birge kókpar, báıge sekildi ulttyq sport túrleri umyt qalmaıdy.

«Óńirde sport jaqsy damyp keledi. Mysaly, ústel tennısinen jetkinshekterimiz jas erekshelikterine qaraı Qazaqstan chempıonatynda úzdik atanyp júr. Áıtse de, olardyń jattyǵatyn jeri talapqa saı kelmeıdi. Sondyqtan 2025 jyly ústel tennısi úshin jańa ǵımarat salatyn bolamyz. Munyń syrtynda jeke sport keshenderi kóbeıip jatyr. Tek sport qana emes, mádenıet, bilim berý, densaýlyq saqtaý salasynda qol jetkizilgen tabystar az emes. Sol sııaqty ekonomıkanyń barlyq salasynda jyl jaqsy qorytyndylanyp jatyr. Ásirese, ınvestıtsııa tartýda kóptegen jumystar atqarylýda. Qoryta aıtqanda, jańa jyldan kúter úmit mol», –dep túıdi oıyn Narıman Tóreǵalıev.

Eske salaıyq, BQO ákimi bıylǵy jyldyń úzdik sportshylaryn marapattaǵan bolatyn.