Kelesi jyly baspana baǵasynda qandaı ózgeris bolýy múmkin – sarapshy pikiri

Kelesi jyly baspana baǵasy qymbattaı ma, álde quldyraı ma? Bul saýalǵa Qazaqstannyń Rıeltorlary birlesken qaýymdastyǵy prezıdentiniń keńesshisi Nına Lýkıanenko jaýap berdi, dep habarlaıdy Kazinform.

«Jyl sońyna deıin arzandaǵan turǵyn úı baǵasynyń qaıtadan kóterilýi múmkin emes. Al kelesi jyl qandaı bolmaq? Kelesi jyl kúrdeli bolady. Kóp jaıt jyljymaıtyn múlik naryǵy men qurylys salasyna jaýapty memlekettik organdardyń is-áreketine baılanysty», - dedi Nına Lýkıanenko agenttik tilshisine bergen suhbatynda.

Osy oraıda, sarapshy kóptegen qurylys kompanııalarynyń birqatar jobasy jurtshylyq nazaryn aýdartqanyn atap ótti.

«Bul durys ta. Almaty qalasy men Almaty oblysynda qoldanystaǵy zańnama talaptaryna saı salynbaǵan nysandardy súrý nemese jartylaı súrý týraly qaýlylardy kórdik. Olardyń sany 40-qa jýyqtaıdy. Munan bólek, memlekettik organdar qurylys kompanııalary qurylystarynyń norma talaptaryna sáıkestigin tekserýdi qolǵa aldy. Demek, jyl ishinde usynystar sanynyń tómendeýi, satyp alýshylardyń salynyp jatqan nysandar boıynsha kelisimshart jasasýda barynsha saqtyq tanytýy baıqalady», - dedi ol.

Sonymen qatar ol baspana baǵasynyń kúrt arzandaýyna da esh alǵyshart joq ekendigin aıtady.

«Baǵanyń kúrt quldyraýyna esh alǵyshart joq. Joǵaryda atap ótken jaıttardy eskersek, baǵanyń aıtarlyqtaı kóterilýi de bolmaıdy. Baǵaǵa yqpal etýin jalǵastyryp otyrǵan ınflıatsııany da qaperden shyǵarmaǵan jón», - dedi Nına Lýkıanenko.