Kelesi jyly alǵashqy atom elektr stantsııasynyń qurylysy bastalady — Toqaev
ASTANA. KAZINFORM — Memleket basshysy Qasym-Jomart Toqaev Parlament palatalarynyń birlesken otyrysynda energetıka salasynda atqarylyp jatqan jumystar jáne josparlar jóninde málimdeme jasady.
— Qazaqstannyń energetıkalyq balansynda kómir, munaı, gaz sekildi otyn túrleri basym.
Kómirsýtegi ulttyq ekonomıkanyń negizin qurap, bıýdjetke valıýtalyq túsimniń qomaqty bóligin qamtamasyz etedi. Munaı-gaz shıkizaty — eksporttan paıda ákelýimen qatar qalalarymyz ben aýyldarymyzdy qamtamasyz etetin baǵasy qoljetimdi jylý men qýat kózi.
Sondyqtan biz eldi mekenderge gaz qubyryn tartýdy jedeldetýdi josparlap otyrmyz. Kógildir otynmen qamtý kórsetkishin (qazir 65 paıyzǵa jýyq) 80 paıyzǵa deıin arttyrý mindeti qoıyldy.
Úkimet dástúrli qýat kózderimen birge «jasyl» energetıkaǵa basa mán berip otyr. Onyń energetıkalyq teńgerimdegi úlesi 7 paıyzǵa jetti, — dedi Prezıdent.
Onyń málimdeýinshe, qarqyndy ósip kele jatqan ekonomıkany qamtamasyz etý úshin 2029 jylǵa qaraı 13 gıgavattan astam jańa qýat kózderin iske qosý josparlanǵan. Osy oraıda, olardyń keminde tórtten biri jańartylatyn energııa kózderi esebinen júzege asyrylmaq.
— Áıtse de paıdaly qazbalarymyz, sonyń ishinde kómirdiń mol qory — tabıǵat syılaǵan artyqshylyǵymyz sanalady. Muny tolyq paıdalanýymyz kerek.
Sondyqtan bıyl naýryz aıynda Taza kómir generatsııasy jónindegi ulttyq joba qabyldandy.
Aldaǵy úsh jylda Kókshetaý, Semeı jáne Óskemen qalalarynda joǵary ekologııalyq standarttarǵa saı keletin tehnologııalardy paıdalanatyn úsh jylý elektr stantsııasyn salýymyz kerek. Muny sozýǵa bolmaıdy. Áıtpese isten góri sóz kóbeıip ketti, — dep synady Memleket basshysy.
Sonymen birge, ol atom energetıkasy jóninde sóz qozǵady.
— Qazaqstan álemde ýran óndirý boıynsha kóshbasshy jáne ıadrolyq ınfraqurylymy bar el sanalady.
Sondyqtan atom generatsııasyn óte durys tańdadyq. 2024 jylǵy tarıhı referendým kezinde halyq qabyldaǵan sheshim, shyn máninde, órkenıetti sıpatqa ıe.
Bul — eldiń energetıkalyq derbestiginiń kepili, qýatty kóp tutynatyn keleshek tsıfrlyq ekonomıkanyń senimdi tiregi.
Kelesi jyly alǵashqy atom elektr stantsııasynyń qurylysy bastalady, — dedi Memleket basshysy.
Aıta keteıik, buǵan deıin Toqaev aldaǵy eki jylda 200-den astam jańa óndiris orny ashylady dep málimdegenin jazǵanbyz.
