Abaı oblysynda jańa sý qoımasynyń qurylysy bastalady
ASTANA. KAZINFORM — Abaı oblysynyń Aqsýat aýdanyndaǵy Qarǵyba ózeninde jańa sý qoımasy salynady, dep habarlaıdy Sý resýrstary jáne ırrıgatsııa mınıstrligi.
Qurylys jumystaryn 2026 jyly bastaý josparlanyp otyr. Qazirgi ýaqytta nysannyń jobalaý-smetalyq qujaty ázirlenip jatyr. Jobany ýaqytyly ári sapaly iske asyrý úshin «Qazsýshar» RMK-nyń jergilikti fılıaly mamandary, Aqsýat aýdany ákimdiginiń qyzmetkerleri jáne merdiger uıym ókilderinen quralǵan komıssııa qurylys júrgiziletin aýmaqty tekserdi.
— Tekserý barysynda taraptar jobany jan-jaqty talqylap, óz usynystaryn ortaǵa saldy. Aýdan ákimdigimen birlesip ishki kanaldar da qaraldy. Jergilikti atqarýshy organdar olardyń rekonstrýktsııasyna qatysty jobalaý-smetalyq qujatty ázirleýmen aınalysady. Jańa sý qoımasy men magıstraldi kanaldar aýdandaǵy ırrıgatsııalyq júıelerdiń tolyqqandy ári tıimdi jumysyn qamtamasyz etedi, — dedi Abaı oblysyndaǵy «Qazsýshar» RMK fılıalynyń dırektory Jarqynbek Baısabyrov.
Osyǵan deıin Abaı oblysynda 10 myń gektardan astam jer memleket menshigine qaıtarylǵany anyqtaldy.