Kelesi jyly 40 myńnan astam qazaqstandyq áskerge shaqyrylady
ASTANA. KAZINFORM – Keler jyly merzimdi áskerı mindetti óteý jasyndaǵy 41 706 Qazaqstan azamaty otan aldyndaǵy boryshyn óteýge shaqyrylady.
Qorǵanys mınıstrligi merzimdi áskerı qyzmettegi áskerı qyzmetshilerdi zapasqa shyǵarý jáne QR azamattaryn 2025 jylǵy naýryz-maýsym jáne qyrkúıek-jeltoqsan aılarynda kezekti merzimdi áskerge shaqyrý týraly Prezıdent Jarlyǵyn iske asyrý barysynda Úkimet qaýlysynyń jobasyn ázirledi. Qujat jobasy «Ashyq NQA» portalynda jarııalandy.
- Oblystarmen qatar Astana, Almaty jáne Shymkent qalalarynyń ákimderine zańnamada belgilengen tártippen áskerge shaqyrý komıssııalarynyń jumysyn uıymdastyrý, onyń ishinde 2025 jylǵy naýryz-maýsym jáne qyrkúıek-jeltoqsan aılarynda áskerge shaqyrýdy keıinge qaldyrýǵa nemese odan bosatýǵa jatpaıtyn 18-27 jas aralyǵyndaǵy 41 706 er azamatty áskerge shaqyrý, áskerge shaqyrý pýnktterin medıtsınalyq qamtamasyz etý tapsyryldy, - delingen qujatta.
Sonymen qatar áskerge shaqyrý maýsymyna birneshe quzyrly memlekettik organdar qatysady. Atap aıtqanda Іshki ister mınıstrligi áskerge shaqyrylýshylardy jınaý jáne jetkizýde polıtsııa qyzmetkerleriniń kúsheıtilgen kezekshiligin júzege asyrady.
Kólik mınıstrligi zapasqa shyǵarylǵan merzimdi qyzmettegi áskerı qyzmetshiler men áskerge shaqyrylýshylardy tasymaldaýdy qamtamasyz etedi.
Sondaı-aq, Qorǵanys mınıstriligi, Іshki ister mınıstrligi jáne Tótenshe jaǵdaılar mınıstrligi merzimdi áskerı qyzmetke shaqyrylǵan azamattardy, sondaı-aq zapasqa shyǵarylǵan áskerı qyzmetshilerdi tasymaldaýshylardy respýblıkalyq bıýdjette kózdelgen qarajat shottary negizinde tasymaldaýǵa arnalǵan shyǵyndy óteıdi.
Qujat jobasy 2024 jylǵy 13 jeltoqsanǵa deıin qoǵamdyq talqylaýǵa usynylyp otyr.
Aıta ketsek, 2025 jyly 915 zapastaǵy ofıtser áskerı qyzmetke shaqyrylady.
Eske sala keteıik, endi elimizde áskerge shaqyrý, bosatý jáne áskerı mindetti óteýdi keıinge qaldyrý týraly habarlama sms arqyly jetkiziledi.